સુરતઃ ‘કોરોના વોરિયર્સ’ પર વધી રહ્યું છે જોખમ, વધુ 10 ડોક્ટર્સ સંક્રમિત

0
67

સુરતઃ પહેલા અમદાવાદ અને હવે સુરત, કોરોના વાયરસ સમગ્ર ગુજરાતને અજગર ભરડો તો લઈ જ રહ્યો છે સાથે સાથે મહાનગરોમાં પણ ચિંતા વધારી રહ્યો છે. સુરતમાં છેલ્લા 24 કલાકમાં શહેરના 215 અને જિલ્લાના વધુ 58 કેસ મળી કુલ 273 કેસ નોંધાયા છે. જોકે, વહીવટી તંત્ર માટે સૌથી વધુ ચિંતાની વાત એ છે કે હવે કોવિડ 19નું સંક્રમણ ‘કોરોના વોરિયર્સ’ને પણ પોતાની જાળમાં સપડાવી રહ્યું છે. આજે(બુધવારે) સુરતમાં વધુ 10 ડોક્ટર્સ સંક્રમિત થયા હતાં.

તંત્રની મુશ્કેલીમાં થયો વધારો
સિવિલ હોસ્પિટલના વધુ 7 ડોક્ટર્સ સહિત 10 ‘કોરોના વોરિયર્સ’ને સંક્રમણનો ચેપ લાગતા તંત્રની મુશ્કેલીમાં વધારો થયો છે. અત્યાર સુધીમાં શહેરના કુલ 119 ડોક્ટર્સ કોરોના વાયરસની ઝપેટમાં આવી ચૂક્યાં છે. નોંધનીય છે કે, સુરતમાં કોરોના વાયરસને હરાવીને સ્વસ્થ થયેલા દર્દીઓની સંખ્યા પણ 4352એ પહોંચી છે. જયારે સુરતમાં કુલ મૃત્યુઆંક પણ 274 થયો છે.

સિવિલ હોસ્પિટલમાં પ્લાઝમા બેંકની શરુઆત
સુરતનું કતારગામ કોરોના વાયરસ સંક્રમણનું હોટસ્પોટ બન્યું છે. શહેરના આ વિસ્તારમાં વધુ ને વધુ કેસો સામે આવતા જ જઈ રહ્યાં છે. આ ઉપરાંત શહેરની નવી સિવિલ હોસ્પિટલમાં પ્લાઝમા બેંકની પણ શરુઆત થઈ છે. મંગળવારે કોરોના વાયરસના સંક્રમણથી સ્વસ્થ થયેલા 9 વ્યક્તિઓએ પ્લાઝમા ડોનેટ કર્યા હતાં. આ ઉપરાંત શહેરની સ્મીમેર હોસ્પિટલે પણ સ્વસ્થ થયેલા વ્યક્તિઓના પ્લાઝમા લેવાનું શરુ કર્યું છે.

કોરોનાનો કહેર, હીરાના કારખાનાઓ પણ બંધ
ગીચ વસ્તી ધરાવતા અનેક વિસ્તારોને માઈક્રોકન્ટેઈન્મેન્ટ ઝોન જાહેર કરાયા છે તો જ્યાં કેસ વધારે છે તેવા હીરાના કારખાનાઓને પણ હાલ પૂરતા બંધ કરવામાં આવ્યાં છે. શહેરમાં દર્દીઓની વધી રહેલી સંખ્યાને ધ્યાનમાં લઈને અનેક કોમ્યુનિટિ હોલમાં પણ કોવિડ કેર સેન્ટર શરુ કરવામાં આવ્યા છે. જ્યારે સુરતમાં કોરોના વાયરસના પ્રકોપને ધ્યાનમાં લઈને ઈન્ડિગોએ પણ 30 જુલાઈ સુધી વાયા સુરતથી બેંગલુરુ, ચેન્નાઈ, દિલ્હી અને ગોલાની ફ્લાઈટ્સ રદ કરી છે.

LEAVE A REPLY

Please enter your comment!
Please enter your name here