અમદાવાદ: ગેરકાયદેસર દારુ વેચતા બુટલેગરોમાં આશરે 60% મહિલાઓ

0
236

, અમદાવાદ: ડ્રાય ગુજરાતમાં દારુના ગેરકાયદેસર વેચાણના ગુનામાં મહિલાઓનો ફાળો પણ સમાન છે. અમદાવાદ જિલ્લાના 460 લિસ્ટેડ બુટલેગરમાંથી આશરે 60% મહિલા બુટલેગર છે, તેમ PCB (પ્રિવેન્શન ઓફ ક્રાઈમ બ્રાંચ)ના વરિષ્ઠ અધિકારીઓએ જણાવ્યું.

એક સમય હતો જ્યારે કાલુપુર અને દરિયાપુર કુખ્યાત બુટલેગર લતીફનો વિસ્તાર ગણાતા હતા. Bacchusના સ્થાનિક પ્રેમીઓ માટે અમીના શેખ જાણીતું નામ છે. સૌંદર્યવાન અમીના શેખ (38 વર્ષ) ત્યારે ચર્ચામાં આવી હતી જ્યારે એક કૌભાંડમાં તેની ધરપકડ બાદ પોલીસકર્મીઓએ તેની સાથે સેલ્ફી લીધી હતી. અમીના શેખના નામે 12 જેટલા પ્રોહિબિશન કેસ બોલે છે, તેમ પોલીસે જણાવ્યું.

પોલીસે કહ્યું, “જો કે, અમીના શેખ ચાલાક ઓપરેટર છે અને ક્યાંક પણ સપડાવાથી બચતી રહે છે. તે વિવાદ કરવા કરતાં સમાધાન કરીને આગળ વધવામાં માને છે.” જો કે, કેટલીક મહિલા બુટલેગરો એવી પણ છે જેમને પોતાની નામચીનતા બતાવવામાં મજા આવે છે. બાપુનગરની માથાભારે મહિલા બુટલેગર સિતારા માત્ર બુટલેગિંગ માટે જ કુખ્યાત નથી તેની સામે મારપીટના પણ ગુના નોંધાયેલા છે અને ઘણીવાર તેની ધરપકડ પણ થઈ છે. સ્થાનિકોનું કહેવું છે કે, સિતારાના સાગરીતો નિયમિત રીતે તેના વિડીયો પોસ્ટ કરતા રહે છે. જેમાં સિતારા દુશ્મનોને કેવી રીતે સંભાળે છે તે દર્શાવે છે, જેથી ‘સિતારા સાથે દુશ્મની નહીં કરવાની’વાળી તેની છબિ જળવાઈ રહે.

સ્થાનિકના જણાવ્યા અનુસાર, “સિતારાને અમુક પોલીસવાળાનો પણ સાથ છે. એવા ઘણા ઉદાહરણ છે જ્યાં તેના ગેરકાયદેસર ધંધા અંગે પોલીસને ફરિયાદ કરી હોય અને પરિણામ સ્વરૂપે ફરિયાદીને ધમકીભર્યા ફોન આવ્યા હોય.” રાયપુરના કંટોડિયાવાસમાં 2009માં લઠ્ઠાકાંડના લીધે મોટી સંખ્યામાં લોકોએ જીવ ગુમાવ્યા હતા. અહીં ગીતા દંતાણી ગેરકાયદે દારુનો વેપલો કરે છે. તે ‘ક્વોર્ટર’ વેચતી હોવાથી ‘ગીતા બાટલીવાલા’ના નામે પણ જાણીતી છે.

સ્થાનિક પોલીસે જણાવ્યું, “ગીતા દેશી દારુ અને IMFL બંને વેચે છે. મુખ્યત્વે 180 MLની ક્વોર્ટર બોટલમાં જ વેચે છે.” ધાનબાઈ મિયાં પોલીસના લિસ્ટમાં નોંધાયેલી વધુ એક મહિલા બુટલેગર છે. પોલીસના સૂત્રોનું માનીએ તો, ધાનબાઈનો પરિવાર ત્રણ પેઢીથી ગેરકાયદેસર દારુ વેચે છે. તેના માતા અને નાની પણ મહિલા બુટલેગર હતા. માધપુરા અને તેની આસપાસના વિસ્તારોમાં ધાનબાઈનું ‘રાજ’ છે. ત્યારે તેણે પોતાની દીકરીઓને આ ‘ખાનદાની ધંધો’ છોડવાની મંજૂરી આપીને પોલીસની મદદથી રિહેબિલેશન માટે મોકલી છે.

અમદાવાદમાં દશકાઓથી મહિલાઓ દારુના ગેરકાયદેસર વેચાણમાં સંકળાયેલી છે. મિલો બંધ થઈ જતાં ઘણાં પરિવારો આર્થિક તંગીમાં સપડાયા હતા, જે બાદ મહિલાઓ આ તરફ વળી હતી. કેટલીક મહિલાઓને તેમના પતિએ આ ધંધામાં આવવા પ્રોત્સાહિત કરી તો કેટલાકને બુટલેગિંગનો છુપો ધંધો ચાલુ જ રાખવા તેમના પતિએ સામેલ કરી. PCBના એક સિનિયર અધિકારીએ કહ્યું, “છેલ્લા બે વર્ષમાં લિસ્ટેડ બુટલેગરોમાં મહિલાઓની સંખ્યા વધી છે કારણકે દારુબંધીનો કડક અમલ કરાવવા માટે પોલીસે સખત કાર્યવાહી કરી હતી.”

LEAVE A REPLY

Please enter your comment!
Please enter your name here