ફટાકડા ઉપરના જુદા જુદા રાજ્યોના પ્રતિબંધથી શિવાકાશીની દિવાળી બગડી

0
169
  • ફટાકડાથી કોરોના દર્દીઓને કોઈ નુકસાન નહીં થાય તેવી ખાતરી સાથે વડાપ્રધાનને પત્ર લખતા ઉત્પાદકો


ફટકાડથી થતા પ્રદૂષણથી કોરોના સંક્રમિત દર્દીઓને વધુ મુશ્કેલી પડવાની આશંકાને પગલે એક પછી એક રાજ્યો ફટાકડા પર પ્રતિબંધ મૂકવા લાગ્યા છે પરિણામે ફટાકડા ઉત્પાદકોની દિવાળી બગડી છે.


આ વર્ષે એક પછી એક રાજ્યો ફટાકડા પર પ્રતિબંધ મૂકી રહ્યા છે. દિલ્હી સરકારે અને બૃહદમુંબઈ મહાનગરપાલિકાએ કોરોનાના કેસો વધવાને પગલે ફટાકડા ફોડવા પર પ્રતિબંધ મૂક્યો. કોલકાતા હાઈકોર્ટે પણ પ્રદૂષણ રોકવા કાલી પુજા દરમિયાન ફટાકડા ફોડવાના લઈને આવો જ નિર્દેશ આપ્યો છે.


આ પહેલા રાજસ્થાન સરકારે આ દિવાળી અને તે પછી આવી રહેલી લગ્નની સીઝનમાં ફટાકડા ફોડવા પર પ્રતિબંધ મૂક્યો હતો. પ્રતિબંધ માટે એવું કારણ અપાયું છે કે, ફટાકડાના ધૂમાડાથી કોરોનાના દર્દીઓને નુકસાન થઈ શકે છે. ઓડિશાએ પણ આવું જ પગલું ભર્યું છે અને ફટાકડાના વેચાણ અને ઉપયોગ પર પ્રતિબંધ મૂકી દીધો છે. તમિળનાડુમાં પણ કોરોના સંક્રમિત લોકોની સલામતી માટે ફટાકડાનો ઉપયોગ ન કરવાની અપીલ કરતા મેસેજ સોશિયલ મીડિયા પર શેર થઈ રહ્યા છે.


જોકે, આ પ્રતિબંધથી તમિળનાડુના શિવાકાશીમાં આવેલી ફટાકડા ઈન્ડસ્ટ્રીઝને મોટો ફટકો પડ્યો છે. શિવાકાશીમાં લગભગ 8 લાખ લોકો ફટાકડા બનાવવાના વ્યવસાય સાથે જોડાયેલા છે. વિવિધ રાજ્યો દ્વારા ફટાકડા પર લગાવવામાં આવી રહેલા પ્રતિબંધોથી આ લોકોની દિવાળી આ વર્ષે બગડી ગઈ છે. શિવાકાશીના જેટલા ફટાકડા આખા વર્ષ દરમિયાન વેચાય છે, તેમાંથી 70 ટકા દિવાળીએ વેચાય છે. ફટાકડા પર પ્રતિબંધ એ શિવાકાશી પર આવી પડેલો ત્રીજો ફટકો છે. લોકડાઉનના કારણે પ્રોડક્શનમાં 30 ટકા ઘટાડો થઈ જતા પહેલો ફટકો પડ્યો. તે પછી બીજો ફટકો મંદીના કારણે માગમાં ઘટાડો થતા પડ્યો હતો.


દેશમાં રાજસ્થાન ફટાકડાનું મોટું માર્કેટ છે. દેશમાં કુલ વેચાતા ફટાકડામાં 12 ટકા રાજસ્થાનમાં વેચાય છે. ઓડિશામાં તો માત્ર 3 ટકા ફટાકડા વેચાય છે, છતાં ત્યાં પ્રતિબંધ મૂકાયો તે ચિંતાનો વિષય છે અને આ સીલસીલો ચાલુ રહ્યો તો શિવાકાશીના ફટાકડા ઉદ્યોગને મોટો ઝટકો લાગશે. જોકે, દિવાળી માટેનો 80થી 90 ટકા સ્ટોક રવાના કરી દેવાયો હોવા છે, પરંતુ જે રાજ્યોમાં ફટાકડા પર પ્રતિબંધ મૂકાયો છે, ત્યાંના હોલસેલરો અને રિટેલરો શિવાકાશીના યુનિટોને ફટાકડા પાછા લઈ લેવા અને રિફંડ આપવા કહી રહ્યા છે.


એ સિવાયના ડિલરોનું કહેવું છે કે, તેઓ ઓછામાં ઓછા એક વર્ષ સુધી નવો ઓર્ડર આપી શકે તેમ નથી કેમકે હાલમાં તેમની પાસે જે સ્ટોક પડ્યો છે તે પણ વેચાય તેવી શક્યતા નથી. ફટાકડા બનાવતા યુનિટોના માલિકોનું કહેવું છે કે, જો ફટાકડા બનાવવાની જરૂર ઊભી નહીં થાય તો કામ બંધ થઈ જશે અને તેના કારણે ફટાકડા ઉદ્યોગ પર એક કરતા વધુ વર્ષ સુધી મોટી અસર પડશે.


તમિળનાડુ ફાયરવર્કસ એન્ડ આમોર્સિસ મેન્યુફેક્ચરર્સ એસોસિએશનના પ્રેસિડન્ટ પી ગનેસને કહ્યું કે, ફટાકડાથી કોરોનાના દર્દીઓને કોઈ નુકસાન નહીં પહોંચે. તેમણે કહ્યું કે, ’વિરુધુનગર જિલ્લામાં શિવાકાશીની આસપાસ આવેલી 1,070 ફટકડા ફેક્ટરીઓ ફટાકડાના વેસ્ટનો દિવસના અંતે નિકાલ કરી દે છે. ફટાકડા બનાવતા કારીગરોને કે આ વિસ્તારના કોરોના દર્દીઓને શ્વાસની કોઈ તકલીફ પડતી નથી.’


વિરુધુનગર જિલ્લામાં છેલ્લા કેટલાક દિવસોમાં રોજના 20 કરતા વધુ કેસ નોંધાયા છે. રાજસ્થાનના મુખ્યમંત્રી અશોક ગેહલોતની વાતનો વિરોધ કરતા એસોસિએશનએ દાવો કર્યો કે, ફટાકડાથી કોઈ ઝેરી ગેસ નીકળતો નથી. આવો કોઈ કેમિકલનો ભારતમાં બનતા ફટાકડામાં ઉપયોગ થતો નથી. ભારતીય ફટાકડામાંથી મોટાભાગે નાઈટ્રોજન નીકળે છે, જે મંદ, બિનહાનિકારક અને બિન ઝેરી છે.


એસોસિએશનએ વડાપ્રધાન, પયર્વિરણ મંત્રાલય, રાજસ્થાનન અને તમિળનાડુના મુખ્યમંત્રીઓ તેમજ રાજકીય પક્ષોના નેતાઓને પત્ર લખીને જણાવ્યું છે કે, ફટાકડાથી કોરોના દર્દીઓને કોઈ નુકસાન નહીં થાય. તમિળનાડુ કોંગ્રેસ કમિટિના પ્રમુખ કે એસ અલગિરિએ રાજસ્થાનના મુખ્યમંત્રીને અપીલ કરતા કહ્યું કે, ગ્રીન ફટાકડાને મંજૂરી આપવામાં આવે કેમકે તે પ્રદૂષણ ઘટાડવા માટે વૈજ્ઞાનિક ઢબે બનાવાયા છે.

LEAVE A REPLY

Please enter your comment!
Please enter your name here