શહેરમાં નો એન્ટ્રી:અમદાવાદની સરહદો સીલ, કડક ચેકિંગ, GJ-01 પાસિંગ વાહનને જ એન્ટ્રી

0
464

શહેરમાં વધતા કોરોનાના સંક્રમણને અટકાવવા માટે સોમવાર સવારે 6 વાગ્યા સુધી કર્ફ્યૂ લાદી દેવામાં આવ્યું છે. જેની કડક અમલવારી કરાવવામાં આવી રહી છે. અમદાવાદની સરહદો પર પોલીસ તેનાત કરી દેવાઈ છે અને કડક ચેકિંગ હાથ ધરવામાં આવી રહ્યું છે. શહેરના રહેવાસીઓ અને GJ-01 પાસિંગના વાહનોને જ પ્રવેશ આપવામાં આવી રહ્યો છે. જેના કારણે શહેર આવતા અન્ય જિલ્લાના મુસાફરોને મુશ્કેલીમાં મુકાયા છે.

સનાથલ સર્કલ પર મુસાફરો મુશ્કેલીમાં પાંચ ગણું ભાડું વસૂલાય છે
શહેરની સરહદ સીલ કરવામાં આવતા સૌરાષ્ટ્ર તરફથી આવતા મુસાફરોને સનાથલ ચોકડી પાસે અટાકવી દેવામાં આવ્યા છે. સનાથલના એન્ટ્રી પોઇટ પર સઘન ચેકિંગ હાથ ધરાઈ રહ્યું છે. દરેક વાહન ચાલકની પૂછપરછ કરવામાં આવી રહી છે.વેલિડ ડોક્યુમેન્ટ ન હોય અથવા યોગ્ય કારણ ન જણાવી શકનારને શહેરમાં પ્રવેશ આપવામાં આવતો નથી. શહેરમાં પ્રવેશ ન મળવાના કારણે મુસાફરોને પરત જવું પડે તેવી સ્થિતિ ઉભી થઇ છે. પરત જવા માગતા મુસાફરો પાસેથી પાંચથી દસ ગણું ભાડું વસૂલવામાં આવી રહ્યું છે.

કોઇ વાહન નથી મળી રહ્યું, પ્રાઈવેટ વાહન 2000 જેટલું ભાડું કહે છેઃ મુસાફરો
સનાથલ ચોકડી પર ફસાયેલા મુસાફરોએ divyabhaskarને જણાવ્યું હતું કે, હું આંધ્રપ્રદેશથી આવ્યો છું અને અહીં ફસાયો છું. કોઇ લઇ જઇ રહ્યું નથી. પ્રાઈવેટ વાહન દ્વારા 1500થી 2 હજાર રૂપિયા ભાડું માગવામાં આવી રહ્યું છે. કેવી રીતે જઇએ. કાલ રાતના ખાધા-પીધા વગરના બેઠાં છીએ. હરિયાણા રોહતકથી આવેલા વિકાસભાઈએ જણાવ્યું હતું કે, 10 વાગ્યે ટ્રેનમાંથી ઉતર્યા બાદ બસમાં બેસાડવામાં આવ્યા હતા અને બાદમાં અધવચ્ચે ઉતારી દેવામાં આવ્યા છે. ત્યાંથી ચાલીને અહીં પહોંચ્યા છીએ. કોઇ વાહન મળી રહ્યું નથી.

વૈષ્ણોદેવી સર્કલ પર શહેરમાં પ્રવેશતા લોકોને અટકાવાયા
ઉત્તર ગુજરાત તરફથી આવી રહેલા મુસાફરોને વૈષ્ણોદેવી સર્કલ પાસે રોકવામાં આવી રહ્યાં છે. જે મુસાફરો યોગ્ય કારણ જણાવે છે તેમને પ્રવેશ આપવામાં આવી રહ્યો છે, જ્યારે અન્યને પરત ફરવા જણાવવામાં આવી રહ્યું છે. જેના કારણે ઘણા લોકોએ પોલીસ સાથે ઘર્ષણમાં ઉતરવું પડ્યું છે. જ્યારે ખાનગી બસોને શહેરમાં પ્રવેશબંધી હોવાથી મુસાફરોને ત્યાં જ ઉતારી દેવામાં આવતા મુસાફરો ત્યાં જ અટવાયા છે.

વડોદરા અને દક્ષિણ ગુજરાત તરફથી આવતા મુસાફરો એક્સપ્રેસ હાઇવે પાસે અટવાયા
દક્ષિણ ગુજરાત અને વડોદરા સહિતના વિસ્તારથી આવતા મુસાફરોને ખાનગી બસો દ્વારા એક્સપ્રેસ હાઈવે પાસે ઉતારી દેવામાં આવ્યા છે. જેના કારણે તેમને હાલાકીનો સામનો કરવો પડ્યો છે. તો બીજી તરફ ખાનગી વાહનો લઇને આવી રહેલા લોકોને શહેરમાં પ્રવેશ આપવામાં ન આવતા તેમને પરત ફરવાનો વારો આવ્યો છે.

LEAVE A REPLY

Please enter your comment!
Please enter your name here