રાજકોટમાં ચાર મહિના બાદ ફરી ક્રિકેટનો જંગ જામશે. કારણ કે, ફરી એક વખત રાજકોટના ખંઢેરી ક્રિકેટ સ્ટેડિયમમાં ભારત અને ઇંગ્લેન્ડ વચ્ચે ટેસ્ટ શ્રેણીની ત્રીજી મેચ રમાવા જઈ રહી છે. આ મેચને લઈ સૌરાષ્ટ્ર ક્રિકેટ એસોસિએશન દ્વારા તડામાર તૈયારીઓ કરવામાં આવી રહી છે. 15 ફેબ્રુઆરીથી શરૂ થતા ટેસ્ટ મેચને લઈ ટિકિટનું વેચાણ પણ શરૂ કરી દેવામાં આવ્યું છે. જેમાં ટિકિટના દર 500થી શરૂ કરી 25,000 રૂપિયા નક્કી કરવામાં આવ્યા છે.
15થી 19 ફેબ્રુઆરી દરમિયાન મેચ રમાશે
વર્ષ 2024ની શરૂઆત થતાની સાથે જ ઇંગ્લેન્ડની ટીમ ભારતના પ્રવાસે આવી છે અને ભારત ઇંગ્લેન્ડ વચ્ચે 5 ટેસ્ટ મેચની શ્રેણી રમાઇ રહી છે. જે પૈકી ત્રીજી ટેસ્ટ મેચ 15થી 19 ફેબ્રુઆરી 2024 દરમિયાન રાજકોટના ખંઢેરી ક્રિકેટ સ્ટેડિયમ ખાતે રમાનાર છે. જેને લઈ સૌરાષ્ટ્ર ક્રિકેટ એસોસિએશન દ્વારા તડામાર તૈયારીઓ કરવામાં આવી રહી છે. રાજકોટમાં રમાનારી ભારત-ઇંગ્લેન્ડ વચ્ચેની ટેસ્ટ મેચની ટિકિટના દર નક્કી કરવામાં આવ્યા છે. જેમાં ક્રિકેટ રસિકોએ ઈસ્ટ ગેટના લેવલ 1, 2 અને 3 માટે સિઝન ટિકિટના રૂ.500 અને એક દિવસના રૂ.120 ચૂકવવાના રહેશે. જ્યારે સૌથી મોંઘી ટિકિટમાં સાઉથ પેવેલિયન બ્લોક-2ના રાખવામાં આવ્યા છે. જેમાં ખાતીરદારી સાથે મેચ જોવા માટે પ્રેક્ષકોએ સિઝન ટિકિટના રૂ.25,000 આપવા પડશે.
સ્ટેડિયમમાં કઈ જગ્યાએ ટિકિટના કેટલા ભાવ
આ ઉપરાંત લેવલ 1માં બ્લોક 1-2 માટે રૂ.5000 અને એક દિવસના રૂ.1200, લેવલ-3માં 2000 અને એક દિવસના રૂ.450, હોસ્પિટાલિટી સાથે 15 સીટના કોર્પોરેટર બોક્સ માટે સીટ દીઠ રૂ.10,000, જ્યારે વેસ્ટ ગેટમાં લેવલ 1, 2 અને 3ના ક્રમશ: 1000, 1200, 1200 તો એક દિવસના ક્રમશઃ 250, 300 અને 300 ભાવ રાખવામાં આવ્યો છે. આ જ સ્ટેન્ડમાં કોર્પોરેટ પ્રિમિયમમાં 15 સીટના બોક્સ માટે એક સીટના રૂ.10,000 લેખે ચૂકવવાના રહેશે.
ભારતની ટીમ હોટેલ સયાજીમાં રોકાશે
ભારત અને ઇંગ્લેન્ડ વચ્ચે રમાતી ટેસ્ટ સિરીઝનો ત્રીજો મેચ રાજકોટમાં રમાનાર છે. માટે 11 ફેબ્રુઆરીના રોજ ભારતીય ટીમના ખેલાડીઓ રાજકોટ આવી પહોંચશે અને કાલાવડ રોડ પર આવેલ હોટલ સયાજીમાં રોકાશે. જ્યારે બીજા દિવસે 12મી ફેબ્રુઆરીના રોજ ઇંગ્લેન્ડની ટીમ રાજકોટ આવ્યા બાદ 150 ફૂટ રિંગ રોડ પર આવેલ ફોર્ચ્યુન હોટલમાં રોકાશે. 6 વર્ષ બાદ ફરીથી રાજકોટમાં ટેસ્ટ મેચ યોજાતા રાજકોટના રિયલ ક્રિકેટ ફેન્સ આતુરતાથી રાહ જોઈ રહ્યા છે.
75 કરોડના ખર્ચે સ્ટેડિયમ બનાવવામાં આવ્યું
રાજકોટથી 12 કિમી દૂર જામનગર રોડ પર ખંઢેરીમાં કુલ 75 કરોડના ખર્ચે આ સ્ટેડિયમ બનાવવામાં આવ્યું છે. સૌરાષ્ટ્ર ક્રિકેટ અસોસિએશનની માલિકીનું આ સ્ટેડિયમ 5.50 લાખ સ્ક્વેર ફૂટમાં ફેલાયેલું છે. ઇન્ટરનેશન સ્ટાન્ડર્ડ મુજબ બનેલા આ સ્ટેડિયમની ડિઝાઇન અને બેઠક વ્યવસ્થા અદભુત છે. આ માટે અલગ અલગ 20થી વધુ દેશોના સ્ટેડિયમનો અભ્યાસ કરવામાં આવ્યો હતો. સ્ટેડિયમ તૈયાર કરવામાં પાંચ વર્ષ લાગ્યા હતા.
સ્ટેડિયમમાં અલભ્ય તસવીરોનું મ્યુઝિયમ પણ
2008માં કાર્યરત થયેલું અને ઇકો ફ્રેન્ડલી સ્ટેડિયમ તરીકે દેશમાં બીજો ક્રમ ધરાવતું રાજકોટનું ખંઢેરી ક્રિકેટ સ્ટેડિયમ મેદાનની સાથે અલભ્ય તસવીરોનું મ્યુઝિયમ પણ બન્યું છે. સૌરાષ્ટ્રના પાટનગર તરીકે ઓળખાતા રાજકોટ શહેરની ભાગોળે 30 એકરમાં ક્રિકેટ સ્ટેડિયમ તૈયાર થયા બાદ અગાઉ કાઠિયાવાડ, નવાનગર અને હાલ સૌરાષ્ટ્ર તરીકે ઓળખાતી ક્રિકેટ ટીમના ખેલાડીઓની તેમજ મેચના સમયની રેર ઓફ ધી રેર ફોટોગ્રાફસ યાદગીરીરૂપે એકઠી કરવાનું બીસીસીઆઇના પૂર્વ સેક્રેટરી એવા નિરંજન શાહે શરૂ કર્યું હતું.
