- 2016માં 15 લાખનો વીમો-ક્લેમ કરાવ્યો, 2020માં ઓડિટ દરમિયાન ભાંડો ફૂટ્યો
મણિનગર વિસ્તારમાં રહેતા અને રિલીફ રોડ પર LIC બ્રાન્ચમાં એજન્ટ યુવકે પત્નીનું કોર્પોરેશનનું ખોટું સર્ટિફિકેટ LIC કંપનીમાં રજૂ કરી રૂ. 15 લાખનો વીમો ક્લેમ કરી પૈસા મેળવ્યા હતા. કંપનીના ઓડિટ દરમિયાન એજન્સીમાં વારસદાર તરીકે પત્નીનું નામ ચાલુ રાખ્યું હોવાની હકીકત બહાર આવતાં સમગ્ર ભાંડો ફૂટ્યો હતો. LICના અધિકારીએ આ મામલે કારંજ પોલીસ સ્ટેશનમાં ફરિયાદ નોંધાવતાં પોલીસે એજન્ટ સામે વધુ તપાસ શરૂ કરી છે.
2012માં પોલિસી લીધી, 2016માં ક્લેમ કર્યો
શહેરના મણિનગર વિસ્તારમાં રહેતો પરાગ પારેખ છેલ્લા ઘણા સમયથી રિલીફ રોડ પર આવેલી LICની બ્રાન્ચમાં એજન્ટ છે. 2012માં પરાગે તેની પત્ની મનીષાના નામે LICની રૂ. 15 લાખની ટર્મ ઇન્શ્યોરન્સ પોલિસી લીધી હતી. 2016માં પરાગે પોતાની પત્ની મનીષાનું અવસાન થઈ ગયું હોવાનું AMCનું સૈજપુર બોધા વોર્ડનું ડેથ સર્ટિફિકેટ રજૂ કર્યું હતું, જેના આધારે LICએ 14.96 લાખની રકમ તેના એકાઉન્ટમાં જમા કરી દીધી હતી.
ઓડિટમાં ડેથ સર્ટિફિકેટ શંકાસ્પદ જણાયું
જુલાઈ 2020માં કંપનીનું ઓડિટ ચાલતું હતું. ઓડિટ દરમિયાન સામે આવ્યું હતું કે મનીષા પારેખનું ડેથ સર્ટિફિકેટ શંકાસ્પદ છે અને પરાગની એજન્સીના વારસદાર તરીકે તેની પત્ની મનીષાનું નામ ચાલુ છે. 25 લાખની પોતાની ટર્મ ઇન્સ્યોરન્સ પોલિસી પણ ગાંધીનગર ખાતે ટ્રાન્સફર કરાવી હતી, જે શંકાસ્પદ જણાઈ હતી. જેથી તપાસ કરતાં પરાગે કંપનીમાં પત્ની જીવિત હોવા છતાં તેનું કોર્પોરેશનનું ખોટું ડેથ સર્ટિફિકેટ પોલિસીના ડેથ ક્લેમ માટે રજૂ કરી રૂ. 15 લાખ મેળવી છેતરપિંડી કરી હોવાનું બહાર આવ્યું હતું. જેથી LICના અધિકારીએ આ મામલે ફરિયાદ નોંધાવતાં પોલીસે તપાસ શરૂ કરી છે.
