રણવીર સિંહ અને ક્રિતી સેનન ગઈકાલે એટલે કે 14 એપ્રિલના રવિવારે વારાણસી પહોંચ્યા હતા. તેની તસવીરો સોશિયલ મીડિયા પર વાઇરલ થઈ રહી છે. રણવીર અને ક્રિતીએ પહેલા બાબા વિશ્વનાથના દર્શન કર્યા હતા. આ ઉપરાંત, કાશીમાં ઇન્ડિયન માઇનોરિટી ફાઉન્ડેશન દ્વારા બે દિવસીય ‘ધરોહર કાશી કી’ ઇવેન્ટનું આયોજન કરવામાં આવ્યું હતું, જેમાં રણવીર સિંહ, ક્રિતી સેનન અને સેલિબ્રિટી ફેશન ડિઝાઇનર મનીષ મલ્હોત્રાએ ભાગ લીધો હતો.
આ કાર્યક્રમમાં બનારસી સંસ્કૃતિની થીમ પર ફેશન શો પણ યોજાયો હતો. તેની એક ઝલક સોશિયલ મીડિયા પર શેર કરવામાં આવી છે. ક્રિતી સેનન આ ઈવેન્ટમાં બનારસી સિલ્ક સાડી પહેરીને ખૂબ જ સુંદર લાગી રહી હતી.
વારાણસીના નમો ઘાટ ખાતે આ કાર્યક્રમનું આયોજન કરવામાં આવ્યું હતું. રણવીર અને ક્રિતીએ ગંગા ઘાટ ખાતે ‘ધરોહર કાશી કી’ કાર્યક્રમમાં બનારસી થીમનું પ્રતિનિધિત્વ કરવા માટે રેમ્પ વોક કર્યું હતું. સોશિયલ મીડિયા પર લોકો તેના લુકને ખૂબ પસંદ કરી રહ્યા છે. ફેશન ઈવેન્ટમાં 20 દેશોના રાજદૂતોએ હાજરી આપી હતી. આ ફેશન શોમાં બનારસના વણકરોની કારીગરી રજૂ કરવામાં આવી હતી.
કાશી આવવા વિશે પૂછવામાં આવેલા સવાલ પર રણવીર સિંહે કહ્યું કે અહીં આવીને ખૂબ જ સારું લાગ્યું. જોકે, આ દરમિયાન તેણે અન્ય કોઈ સવાલનો જવાબ આપ્યો ન હતો.
રણવીર ગંગા દ્વાર પર પહોંચતા જ તેણે ભક્તોને ફ્લાઈંગ કિસ આપી અને સુરક્ષા કોર્ડન તોડીને ભક્તોની વચ્ચે પહોંચી ગયો. બાબા વિશ્વનાથના દરબારમાં જતી વખતે તેમણે અનેકવાર હર-હર મહાદેવનો જયકાર કર્યો હતો
બંને ફિલ્મ સ્ટાર્સે કાશી વિશ્વનાથ મંદિરમાં 20 મિનિટથી વધુ સમય વિતાવ્યો હતો. આ દરમિયાન મંદિર પ્રશાસન દ્વારા પૂજા માટે વિશેષ વ્યવસ્થા કરવામાં આવી હતી.
