દુનિયાના ઘણા દેશો લોન લઈને પોતાની અર્થવ્યવસ્થા ચલાવી રહ્યા છે, પરંતુ શું તમે જાણો છો કે દુનિયાનો સૌથી મોટો દેવાદાર દેશ કયો છે? હાલમાં જ વર્લ્ડ ઓફ સ્ટેટિસ્ટિક્સે સોશિયલ મીડિયા પ્લેટફોર્મ X પર વિશ્વના તે દેશોની યાદી જાહેર કરી છે જે સૌથી વધુ દેવાદાર છે.
આ યાદીમાં ટોચના 10 દેશોમાં અમેરિકા, ચીન, જાપાન, યુનાઇટેડ કિંગડમ, ફ્રાન્સ, ઇટાલી, ભારત, જર્મની, કેનેડા અને બ્રાઝિલનો સમાવેશ થાય છે. આશ્ચર્ય વચ્ચે યાદીમાં ટોચ પર નામ યુનાઇટેડ સ્ટેટ્સનું છે.
વિશ્વના સૌથી મોટા દેવાદાર દેશોમાં અમેરિકા પ્રથમ ક્રમે છે. આ દેશ પર 33,229 અબજ ડોલરનું દેવું છે. દેવાની બાબતમાં ચીનનું નામ બીજા નંબરે આવે છે અને આ દેશ પર 2023માં 14,692 અબજ ડોલરનું દેવું હતું.
આ યાદીમાં જાપાનનું નામ ત્રીજા સ્થાને છે. જાપાન પર 10,797 અબજ ડોલરનું દેવું છે. દેવાની બાબતમાં યુનાઇટેડ કિંગડમનું નામ ચોથા સ્થાને આવે છે. આ દેશ પર 3,469 અબજ ડોલરનું દેવું છે. વિશ્વના દેવાદાર દેશોની યાદીમાં ફ્રાન્સ પાંચમા સ્થાને છે. તેના પર 3,354 અબજ ડોલરનું દેવું છે.
ભારત યાદીમાં સાતમા સ્થાને છે. દેવાદાર દેશોની યાદીમાં ભારત ટોચના 10 દેશમાં સામેલ છે. ભારત પર 2023 સુધીમાં 3,057 બિલિયન ડોલરનું દેવું છે.
