જૂનાગઢ તાલુકાના ગલિયાવડ ગામે રહેતા ફરિયાદી પ્રવીણભાઈ ગોપાલભાઈ બુટાણીએ આરોપી રોહિતભાઈ બેચરા વિરુદ્ધ જૂનાગઢ તાલુકા પોલીસ સ્ટેશન ખાતે પોતાને આરોપીએ પેન્સિલ બનાવવાનું મશીન આપી, જોબવર્ક આપવાની લાલચ આપી, રૂપિયા એક લાખની છેતરપીંડી કર્યા અંગેની ફરિયાદ કરવામાં આવતા, જૂનાગઢ તાલુકા પોલીસ સ્ટેશન ખાતે છેતરપીંડી વિશ્વાસઘાત અંગે ગુન્હો નોંધી, તપાસ તાલુકા પીએસઆઇ એસ.એન.સગારકા, હે.કો. આર.એન.બાબરીયા સહિતની ટીમ દ્વારા હાથ ધરવામાં આવી હતી.
જુનાગઢ તાલુકા પોલીસ સ્ટેશન ખાતે પેન્સિલના મશીન આપી, જોબ વર્ક થી રૂપિયા કમાવવાની લાલચ આપી, કરવામાં આવેલ છેતરપીંડી ના ગુન્હાના આરોપીએ બીજા શહેરોમાં ગુન્હાઓ આચર્યાની શક્યતાઓ આધારે ગુન્હાની ગંભીરતા લઈ, જૂનાગઢ જિલ્લાના ઉચ્ચ પોલીસ અધિકારીઓ દ્વારા આ ગુન્હામાં સંડોવાયેલ આરોપીને પકડી પાડી, કાર્યવાહી કરવા સૂચનાઓ આપવામાં આવી હતી
જૂનાગઢ ડિવિઝનના ડીવાયએસપી પ્રદીપસિંહ જાડેજાના માર્ગદર્શન હેઠળ તાલુકા પોલીસ સ્ટેશનના પી.એસ.આઈ એસ.એન.સાગરકા તથા સ્ટાફની ટીમ દ્વારા સઘન તપાસ હાથ ધરી, ડીવાયએસપી કચેરીના ટેક્નિકલ સેલના સોર્સ આધારે મળેલ માહિતી અનુસાર આરોપી રોહિત બેચરા સુરત ખાતે હોઈ, સુરત તપાસ દરમિયાન આ બાબતે સુરત ક્રાઇમ બ્રાન્ચને જાણ કરવામાં આવતા તેમની મદદથી આ ગુન્હામાં સંડોવાયેલ આરોપી રોહિત મનસુખભાઇ બેચરા જાતે પટેલ ઉવ. ૩૭ રહે.૨૦૫, ધારા કોમ્પ્લેક્સ, કુબેર પાર્ક, વેડ રોડ, સુરતને પકડી પાડી, ધરપકડ કરવામાં આવી હતી
ઝડપાયેલ આરોપી રોહિત સઘન પૂછપરછ હાથ ધરવામાં આવતા, પોતે મૂળ જૂનાગઢ જિલ્લાના માણાવદર તાલુકાના ઇન્દ્રા ગામનો વતની હોવાનું અને પોતાને જે પેઢી મશીન સપ્લાય કરતી હતી, તે પેઢીએ તેમને ત્રણ ચાર મહિના મશીન સપ્લાય કરેલ અને જોબ વર્ક પણ આપેલ. પરંતુ, ચાર મહિના બાદ એ પેઢી બધુ છોડીને ઉઠી જતા અને તેના માલીકો તમામ જવાબદારી માંથી હાથ ઉચા કરી દેતા, પોતે ફરિયાદીને મશીન આપવામાં તથા જોબ વર્ક આપવામાં વચ્ચે હોઈ, પોતાની સાથે પણ ૧૫ લાખ જેટલા રૂપિયાનું ચિટિંગ થઈ જતા, પોતાની આર્થિક સ્થિતિ પણ કફોડી થઈ જવા પામી હોવાનું રટણ કર્યું હતું. આરોપી ફરિયાદી સિવાય અન્ય લોકોને પણ પોતે પેન્સિલ મશીન સપ્લાય કર્યાની પણ કબૂલાત આરોપી દ્વારા કરવામાં આવેલ પોતાને આ ધંધામાં ખોટ જતા, પોતે હાલ જમીન મકાનની દલાલીનો ધંધો કરતો હોવાનું જણાવ્યું હતું , ઉટરાંત ભોગ બનનાર તમામ લોકો ને રૂપિયા પરત ચૂકવવા તૈયારી પણ બતાવી હતી.
પકડાયેલ આરોપી રોહિત ની વધુ પૂછપરછ હાથ ધરી, પોલીસ રીમાન્ડ મેળવવા સહિતની તજવીજ તાલુકા પોલીસ સ્ટેશનના પીએસઆઈ એસ.એન.સગારકા,તથા સ્ટાફ દ્વારા હાથ ધરવામાં આવી હતી જેમાં ત્રણ દિવસના રિમાન્ડ ની માંગણી સાથે આરોપીને કોર્ટમાં રજૂ કરતા નામદાર કોર્ટે આરોપીના રિમાન્ડ ના મંજૂર કરી જેલ હવાલે કર્યો હતો.
અહેવાલ- હુસેન શાહ, જૂનાગઢ
