‘ટાઈટેનિક ગર્લ’ તરીકે આખી દુનિયામાં પ્રખ્યાત અભિનેત્રી કેટ વિંસલેટ આ ફિલ્મ માટે પહેલી પસંદ નહોતી. ફિલ્મના ડાયરેક્ટર જેમ્સ કેમરૂને આ રોલ માટે અન્ય કોઈની પસંદગી કરી હતી. જો કે, કેટ વિંસલેટ આ ફિલ્મમાં કામ કરવા માગતી હતી, તેથી તેણે વારંવાર જેમ્સ કેમરનનો સંપર્ક કર્યો. જેમ્સ કેમરૂનને ખૂબ આજીજી કર્યા પછી તેને ‘ટાઇટેનિક’માં કામ મળ્યું. 2008 માં, તેને ફિલ્મ ‘ધ રીડર’ માટે શ્રેષ્ઠ અભિનેત્રીનો ઓસ્કાર એવોર્ડ મળ્યો હતો, જે તેણે બાથરૂમમાં રાખ્યો હતો.
કેટ વિંસલેટનો જન્મ 5 ઓક્ટોબર, 1975ના રોજ ઈંગ્લેન્ડમાં થયો હતો. અભિનેત્રીનું પૂરું નામ કેટ એલિઝાબેથ વિંસલેટ છે. તેના માતાપિતા થિયેટર આર્ટિસ્ટ હતાં. થિયેટર આર્ટિસ્ટ હોવા ઉપરાંત, કેટની માતા સેલી બ્રિજ એક બારમેઇડ હતી. તેમના પિતા રોજર વિંસલેટ સ્વિમિંગ પૂલ કોન્ટ્રાક્ટર હતા. કેટના દાદા-દાદીએ રીડિંગ રેપર્ટરી થિયેટરની સ્થાપના કરી હતી. તેમના ભાઈ-બહેનોમાં ભાઈ જોસ વિંસલેટ અને બે બહેનો બેથ અને અન્નાનો સમાવેશ થાય છે. બંને બહેનો પણ અભિનેત્રી છે.
કેટ વિંસલેટનું બાળપણ અત્યંત આર્થિક ગરીબીમાં વીત્યું હતું. અભિનેત્રીના પિતાને અકસ્માતમાં પગમાં ગંભીર ઈજા થઈ હતી. જેના કારણે પરિવારને આર્થિક તંગીનો સામનો કરવો પડ્યો હતો. ખાવા પીવાની સમસ્યા એટલી બધી હતી કે આખો પરિવાર લાંબા સમય સુધી મફત ભોજન પર નિર્ભર રહ્યો હતો. અનાથાશ્રમ ચેરિટી ફંડે વિંસલેટ પરિવારને ઘણી મદદ કરી હતી.
કેટ વિંસલેટ બાળપણથી જ અભિનય તરફ ઝોક ધરાવતી હતી. તે 11 વર્ષની ઉંમરે થિયેટર સાથે જોડાઈ હતી. તેણે રેડરૂફ્સ થિયેટર સ્કૂલમાં નાટકનો અભ્યાસ કર્યો. આ સમયગાળા દરમિયાન, તેણે 20 થી વધુ નાટકોમાં કામ કર્યું, પરંતુ તેના વજનને કારણે તેને ક્યારેય મુખ્ય ભૂમિકા મળી નહીં. આ સમય દરમિયાન જ તેણે પહેલીવાર જાહેરાતમાં કામ કર્યું હતું.
કેટ વિંસલેટે 15 વર્ષની ઉંમરે બ્રિટિશ ટેલિવિઝન સિરીઝ ‘ડાર્ક સિઝન’થી અભિનયની શરૂઆત કરી હતી. આ સિરીઝમાં, કેટે એક ખૂનીની ભૂમિકા ભજવી હતી, જે તેના માટે ભાવનાત્મક રીતે ખૂબ જ પડકારજનક હતી. આ રોલ બાદ તેને ઈમોશનલી સ્વસ્થ થવામાં ઘણો સમય લાગ્યો હતો.
કેટે ડિરેક્ટર પીટર જેક્સનની ફિલ્મ ‘હેવનલી ક્રિચર્સ’થી ફિલ્મોમાં અભિનયની શરૂઆત કરી હતી. આ ફિલ્મ 1994માં રિલીઝ થઈ હતી. જ્યારે કેટ વિન્સલેટને આ ફિલ્મમાં કામ મળવાના સમાચાર મળ્યા ત્યારે તેની પ્રતિક્રિયા જોવા જેવી હતી. તેણી માની શકતી ન હતી કે તેણે આ મહત્ત્વપૂર્ણ ભૂમિકા ભજવી હતી,કારણ કે તે માત્ર 17 વર્ષની હતી. તે પોતાની ખુશી છુપાવી ન શકી અને લંડનની શેરીઓમાં દોડતાં દોડતાં બૂમો પાડવા લાગી. તે તેના માટે એક સ્વપ્ન સાકાર થવા જેવું હતું.
કેટ વિંસલેટે તેની અભિનય કારકિર્દીમાં ઘણા યાદગાર પાત્રો ભજવ્યા છે, પરંતુ ‘ટાઈટેનિક’ની રોઝે તેનું ભાગ્ય બદલી નાખ્યું. આ પાત્ર શરૂઆતમાં ક્લેર કેથરિન દ્વારા ભજવવાનું હતું. ફિલ્મના દિગ્દર્શક જેમ્સ કેમરૂનના દિલ અને દિમાગમાં ક્લેર કેથરિન હતી, પરંતુ કેટ વિંસલેટ આ ફિલ્મ માટે ઘણી વખત ડિરેક્ટરને મળી હતી. તેમની સામે રોલ માટે ખૂબ જ આજીજી કરી હતી.વારંવાર વિનંતી પછી જેમ્સે તેને ટાઇટેનિક માટે પસંદ કરી હતી.
કેટ વિંસલેટ હજુ પણ ‘ટાઈટેનિક’ના સહ-અભિનેતા લિયોનાર્ડો ડી કેપ્રિયોને પોતાનો શ્રેષ્ઠ મિત્ર માને છે. અભિનેત્રીએ એક ઈન્ટરવ્યૂ દરમિયાન કહ્યું હતું કે ‘ટાઈટેનિક’ના સેટ પર તેને તરત જ ખબર પડી ગઈ હતી કે ડી કેપ્રિયો તેના જેવો જ છે અને બંનેને સારું બનશે. આજે પણ બંને સમય કાઢીને એકબીજા સાથે વાત કરે છે અને એકબીજાને ટાઈટેનિકની વિચિત્ર લાઈનો કહે છે.
બ્રિટિશ ટેલિવિઝન સિરીઝ ‘ડાર્ક સિઝન’ના શૂટિંગ દરમિયાન, કેટ વિંસલેટ તેના કરતા 12 વર્ષ મોટા અભિનેતા સ્ટીફન ટ્રેડ સાથે સંબંધમાં આવી ગઈ. કેટના જીવનમાં સ્ટીફનનો મોટો પ્રભાવ રહ્યો છે. જો કે, આ સંબંધ ફક્ત 4 વર્ષ જ ચાલ્યો. 1995માં બંનેનું બ્રેકઅપ થઈ ગયું. બ્રેકઅપના બે વર્ષ પછી સ્ટીફનનું કેન્સરથી મૃત્યુ થયું હતું. કેટ વિંસલેટ તેમના અંતિમ સંસ્કારમાં હાજરી આપવાના કારણે ‘ટાઈટેનિક’ના પ્રીમિયરમાં હાજરી આપી શકી ન હતી.
કેટ વિંસલેટે ત્રણ વાર લગ્ન કર્યા. તેને પ્રથમ લગ્ન 1998 માં ડિરેક્ટર જીમ થ્રીલ નેટ સાથે કર્યા હતા, પરંતુ 2001 માં આ દંપતીએ છૂટાછેડા લીધા હતા. બંનેને એક પુત્રી મિયા હતી. 2003માં કેટે સેમ મેન્ડિસ સાથે લગ્ન કર્યા. આ લગ્ન પણ લાંબું ટકી શક્યા નહીં અને 2011માં બંનેના છૂટાછેડા થઈ ગયા. સેમ અને કેટને એક પુત્ર છે. કેટે 2012માં ન્યૂયોર્કમાં ગુપ્ત રીતે નેડ રોકનરોલ સાથે ત્રીજી વખત લગ્ન કર્યા હતા. 2013 માં, દંપતીને એક પુત્ર, બીયર હતો.
‘ટાઈટેનિક’ પછી કેટ વિંસલેટને બોડી શેમિંગમાંથી પસાર થવું પડ્યું. કેટલાક લોકો તેને જાડી કહેતા હતા. આમાંથી બહાર આવતાં તેને ઘણાં વર્ષો લાગ્યાં. હાલમાં જ વેરાયટી મેગેઝીનને આપેલા ઈન્ટરવ્યૂ દરમિયાન અભિનેત્રીએ બોડી શેમિંગ અંગે ખૂલીને વાત કરી હતી. અભિનેત્રીએ કહ્યું હતું- આજનો યુગ 1998ના યુગથી ઘણો અલગ છે. આજે અભિનેત્રીઓ તેમના શરીર વિશે સ્વતંત્ર છે. તેમને બોડી શેમિંગનો ભોગ બનવું પડતું નથી. હું આ પરિવર્તનથી ખુશ છું.’
કેટ વિન્સલેટની ફિલ્મ ‘ટાઈટેનિક’નો ન્યૂડ સીન આજે પણ આખી દુનિયામાં સૌથી ફેમસ અને સનસનાટીભર્યો છે. અભિનેત્રીના કહેવા પ્રમાણે, જો વાર્તાની માગ હોય તો તેને ન્યૂડ સીન આપવામાં કોઈ વાંધો નથી. કેટ વિંસલેટે ‘ટાઈટેનિક’ ઉપરાંત ‘હેવનલી ક્રિચર્સ’, ‘જ્યૂડ’, ‘હાઇડસ કિંકી’, ‘હોલી સ્મોક’, ‘ક્વિલિસ’, ‘આઈરિસ’, ‘લિટલ ચિલ્ડ્રન’ અને ‘ધ રીડર’માં પણ ન્યૂડ સીન આપ્યાં છે. અભિનેત્રીને ‘ધ રીડર’ માટે ઓસ્કાર એવોર્ડ મળ્યો હતો.
6 નોમિનેશન પછી, કેટ વિંસલેટને આખરે 2008 માં ફિલ્મ ‘ધ રીડર’ માટે ઓસ્કાર એવોર્ડ મળ્યો. તે ઓસ્કાર એવોર્ડની ટ્રોફી બાથરૂમમાં રાખે છે. અભિનેત્રીએ એક ઈન્ટરવ્યૂ દરમિયાન આ વિશે રસપ્રદ ખુલાસો કર્યો હતો.અભિનેત્રીએ જણાવ્યું હતું કે, બાળપણમાં તે હાથમાં શેમ્પૂની બોટલ લઈને બાથરૂમમાં અરીસા સામે ભાષણ આપવાનું અને એવોર્ડ મેળવવાના સપના જોતી હતી. તેથી તેણે પોતાનો એવોર્ડ બાથરૂમમાં જ રાખ્યો હતો. કેટ વિન્સલેટ તેની પાછળ બીજું કારણ આપે છે. તેણે કહ્યું કે જ્યારે પણ કોઈ મહેમાન બાથરૂમ જાય છે ત્યારે તે ઓસ્કર સાથે અરીસા સામે પોતાનો સમય વિતાવી શકે છે.
