વિશ્વ હિંદુ પરિષદ (VHP) અને બજરંગ દળના આહવાન પર હરિયાણાના નૂંહમાં આજે ફરીથી કાવડ (બ્રજમંડળ) યાત્રા મામલે મક્કમ છે. હરિયાણા સરકાર અને નૂંહ જિલ્લા પ્રશાસને આ યાત્રા માટે મંજુરી આપી ન હતી. પરંતુ, સોમવારે સવારે 10-15 સંતોને નલહરેશ્વર મંદિરમાં જલાભિષેક માટે મંજુરી આપવામાં આવી છે. પોલીસ સત્તાવાળાઓ પાસે મંદિરમાં જનાર તમામ સાધુ- સંતોની સંપૂર્ણ યાદી છે.
31મી જુલાઈએ કાવડ યાત્રા દરમિયાન થયેલી હિંસા બાદ સમગ્ર નૂંહમાં કલમ 144 લાગુ કરવામાં આવી છે.
પોલીસ બે વાહનોમાં નૂંહ બાયપાસથી લોકોને લઈને નલહરેશ્વર મંદિરે જવા નીકળી છે. આમાં લગભગ 30 લોકો છે. મંદિરનો આખો દોઢ કિલોમીટર વિસ્તાર સીલ કરી દેવામાં આવ્યો છે. બહારના લોકો સિવાય મીડિયાને પણ આગળ જવાની મંજુરી નથી. ID જોઈને માત્ર સ્થાનિક લોકોને જ એન્ટ્રી આપવામાં આવી રહી છે.
અયોધ્યાથી નૂંહ યાત્રામાં ભાગ લેવા આવેલા સંત જગદગુરુ પરમહંસ આચાર્ય મહારાજને વહીવટીતંત્ર દ્વારા ગુરુગ્રામના સોહના ટોલ પ્લાઝા પર રોકી દેવામાં આવ્યા હતા. આ કાર્યવાહીની વિરોધમાં તેઓએ પ્લાઝા પાસે આમરણાંત ઉપવાસ શરૂ કર્યા છે. 31 જુલાઈના રોજ કાવડ યાત્રા દરમિયાન હિંસા થઈ હતી. જેમાં 2 હોમગાર્ડ સહિત 6 લોકો શહીદ થયા હતા.
નૂહ કાવડ યાત્રા મામલે અપડેટ્સ….
- 31 જુલાઈના રોજ કાવડ યાત્રા દરમિયાન હિંસા થઈ હતી. જેમાં હોમગાર્ડ સહિત 6 લોકો શહીદ થયા હતા. હરિયાણા પોલીસે નૂંહમાં વિસ્તૃત સુરક્ષા વ્યવસ્થા હોવાનો દાવો કર્યો છે. ડ્રોન દ્વારા સંવેદનશીલ વિસ્તારો પર નજર રાખવામાં આવી રહી છે. 27 ઓગસ્ટથી જિલ્લાની તમામ સરહદો સીલ કરી દેવામાં આવી છે. હરિયાણાની દિલ્હી, રાજસ્થાન અને યુપી સાથેની સરહદો પણ સીલ કરી દેવામાં આવી છે.
- સરહદી વિસ્તારમાં મોટી સંખ્યામાં પોલીસકર્મીઓ અને અર્ધલશ્કરી દળના જવાનોને તૈનાત કરવામાં આવ્યા છે, જેઓ આવતા-જતા તમામ વાહનોનું ચેકિંગ કરી રહ્યા છે. આ તરફ નૂહની શાળા-કોલેજ, બેંક અને અન્ય તમામ ઓફિસો પણ બંધ રાખવામાં આવી છે. સરકારે આજે મધરાત 12 વાગ્યા સુધી મોબાઈલ ઈન્ટરનેટ અને SMS સેવાઓ પર પણ પ્રતિબંધ લગાવી દીધો છે.
- આ વખતે મુસ્લિમ સમુદાય પણ સાવચેતી રાખી રહ્યો છે. રવિવારે જ જિલ્લાના ગામડાઓમાં આવેલી મસ્જિદોમાંથી જાહેરાત કરવામાં આવી હતી કે સોમવારે યાત્રા હોવાથી મુસ્લિમ સમાજના લોકોએ ઘરની બહાર ન નીકળવું. ગામડાઓમાં પણ કોઈ પણ જગ્યાએ 4 થી વધુ લોકો એકઠા ન થવા જોઈએ. કોઈએ પોતાના ગામની બહાર ન જવું જોઈએ.
પહેલા યાત્રાનું શિડ્યુલ જાણો
VHP દ્વારા આજની કાવડ યાત્રા માટે જાહેર કરાયેલા સમયપત્રક મુજબ, યાત્રા સવારે 11 વાગ્યે નૂંહના નલ્હડ ગામમાં સ્થિત ઐતિહાસિક નલહરેશ્વર મહાદેવ મંદિરથી જલાભિષેક સાથે શરૂ થશે. અહીંથી યાત્રા નૂંહ નગર થઈને ફિરોઝપુર ઝિરકા પહોંચશે અને પછી સિંગર ગામ સુધી જશે. સિંગર ગામમાં જ આ યાત્રા સમાપ્ત થશે. આ દરમિયાન નલહરેશ્વર મંદિર અને ફિરોઝપુર ઝિરકા અને સિંગર ગામના મંદિરોમાં જલાભિષેકનો કાર્યક્રમ યોજાશે.
VHP નેતા આલોક કુમારે કહ્યું કે મેવાતનો વિસ્તાર સંવેદનશીલ છે, તેથી અમે 31 જુલાઈએ હિંસાને કારણે અધૂરી રહી ગયેલી યાત્રા ટૂંકી કરીશું, પરંતુ તેને રોકીશું નહીં. તેમણે કહ્યું કે ગત વખતે જે યાત્રા અધવચ્ચે અટકાવાઈ હતી, તેને સાવનનાં સોમવારે પૂર્ણ કરવી જરૂરી છે અને આજે એટલે કે 28 ઓગસ્ટે સાવનનો છેલ્લો સોમવાર છે.
CM-VHP આમને-સામને
હરિયાણાના સીએમ મનોહર લાલ અને વિશ્વ હિન્દુ પરિષદના નેતાઓ આ યાત્રાને લઈને વિવાદમાં છે. મુખ્યમંત્રીએ યાત્રાના એક દિવસ પહેલા રવિવારે કહ્યું હતું કે, નૂંહમાં ફરી યાત્રા કાઢવાની મંજુરી આપવામાં આવી નથી. એક મહિના પહેલા જ અહીં હિંસક ઘટના બની હતી અને તે અંગે સાવચેતી રાખવાની જરૂર છે. મુખ્યમંત્રીએ લોકોને અપીલ કરી હતી કે તેઓ નૂંહમાં ન જાય અને તેમના નજીકના મંદિરમાં જલાભિષેકનો કાર્યક્રમ કરે.
સીએમના આ નિવેદન બાદ VHPના રાષ્ટ્રીય પ્રવક્તા વિનોદ બંસલે કહ્યું કે 28 ઓગસ્ટે સવારે 11 વાગ્યે તેઓ નૂંહના નલ્હારેશ્વર મંદિરથી યાત્રાની શરૂઆત કરશે. આ યાત્રા માટે મંજુરી લેવાનો પ્રશ્ન જ ઊભો થતો નથી.
નૂંહમાં ડ્રોન દ્વારા નજર રાખવામાં આવી રહી છે
હિંદુ સંગઠનો ફરી યાત્રા કાઢવા પર મક્કમ હોવાથી નૂંહ સહિત સમગ્ર હરિયાણામાં પોલીસ હાઈ એલર્ટ પર છે. નૂંહમાં પોલીસ સંવેદનશીલ વિસ્તારો પર નજર રાખવા માટે ડ્રોનનો ઉપયોગ કરી રહી છે. નૂંહના ડીએસપી (હેડક્વાર્ટર) સુરેન્દ્રના જણાવ્યા અનુસાર, પોલીસ દરેક સાવચેતી રાખી રહી છે જેથી શાંતિ અને વ્યવસ્થા જળવાઈ રહે.
57 સ્પેશિયલ ડ્યુટી મેજિસ્ટ્રેટ
પોલીસ-પ્રશાસને નૂંહ જિલ્લાની તમામ સરહદો સીલ કરી દીધી છે. જિલ્લામાં શાંતિ અને વ્યવસ્થા જાળવવા માટે 57 સ્પેશિયલ ડ્યુટી મેજિસ્ટ્રેટની નિમણૂક કરવામાં આવી છે. નૂહના ડીસી ધીરેન્દ્ર ખડગટા અને એસપી નરેન્દ્ર બિજારનિયા સહિત સરકારના ઘણા ઉચ્ચ અધિકારીઓ નૂહમાં કેમ્પ કરી રહ્યા છે. ફરિદાબાદના ડિવિઝનલ કમિશ્નર ઉપરાંત એડીજીપી મમતા સિંહ અને નોડલ ઓફિસર અજીત બાલાજી જોશી આમાં સામેલ છે. મમતા સિંહ 31મી જુલાઈથી નૂહમાં છે.
આજે શાળા-કોલેજ અને બેંક બંધ
નૂંહ જિલ્લામાં આજે તમામ શાળાઓ, કોલેજો અને અન્ય શૈક્ષણિક સંસ્થાઓ બંધ રહેશે. બેંકો પણ બંધ રહેશે. નૂહના ડીસી ધીરેન્દ્ર ખડગટાએ જણાવ્યું કે યાત્રાને કારણે સાવચેતીના ભાગરૂપે આ પગલું લેવામાં આવ્યું છે. હરિયાણા પોલીસ ઉપરાંત આરએએફ અને અર્ધલશ્કરી દળના જવાનો જિલ્લાની તમામ સરહદો પર તૈનાત છે. રવિવારે સાંજે સમગ્ર જિલ્લામાં ફ્લેગ માર્ચ કાઢવામાં આવી હતી.
DGP-CID ચીફ સાથે મુખ્યમંત્રીની બેઠક
નૂંહમાં ફરી યાત્રા કાઢવાની જાહેરાત બાદ રવિવારે સવારે CM મનોહર લાલે રાજ્યના DGP શત્રુજિત કપૂર અને CID ચીફ એડીજીપી આલોક મિત્તલ સાથે ચંદીગઢમાં તેમના નિવાસસ્થાને 2 કલાક લાંબી બેઠક યોજી હતી. જેમાં નૂહની તાજેતરની સ્થિતિ અને યાત્રા કાઢવામાં આવી હોવાની ઘટનામાં ઈન્ટેલિજન્સ ઈનપુટની ચર્ચા કરવામાં આવી હતી.
31 જુલાઈએ થયેલી હિંસા દરમિયાન પોલીસ અને સીઆઈડી વચ્ચે સંકલનના અભાવને લઈને સવાલો ઉભા થયા હતા. સીઆઈડી ઈન્સ્પેક્ટરે દાવો કર્યો હતો કે તેણે હિંસાની આશંકાનો ઈનપુટ મોકલ્યો હતો પરંતુ પોલીસ અધિકારીઓએ કહ્યું કે તેમને આવું કોઈ ઈનપુટ મળ્યા નહોતા. જે બાદ ગૃહમંત્રી અનિલ વિજે પણ ગૃહ સચિવને ઈન્સ્પેક્ટરના દાવાની તપાસ કરવાનો આદેશ આપ્યો હતો.
