- ગુજરાતને SOU જેવા એક નવા આંતરરાષ્ટ્રીય કક્ષાના પ્રવાસન સ્થળની ભેટ મળશે
- ચાર થીમ પાર્ક અને સમુદ્રી વારસાને દર્શાવતી 14 ગેલેરી પણ હશે
- વિશ્વનું સૌથી ઊંચુ લાઇટ હાઉસ હશે
ગુજરાતીઓને આગામી સમયમાં સ્ટેચ્યૂ ઓફ યુનિટીની જેમ એક નવા આંતરરાષ્ટ્રીય કક્ષાના પ્રવાસન સ્થળની ભેટ મળી શકે છે. ગુજરાતના લોથલમાં દુનિયાના સૌથી મોટા મેરિટાઇમ મ્યુઝિયમનું નિર્માણ કાર્ય ચાલી રહ્યું છે. 400 એકર જમીનમાં રૂ. 4000 કરોડના ખર્ચે બની રહેલા નેશનલ મેરિટાઇમ હેરિટેજ કોમ્પ્લેક્સની કામગીરી ત્રણ તબક્કામાં થશે. 2024માં પહેલા તબક્કાની કામગીરી પૂર્ણ થવાનો અંદાજ છે. 2022ના માર્ચમાં આ પ્રોજેક્ટની કામગીરી શરૂ કરાઇ હતી. નેશનલ મેરીટાઇમ હેરિટેજ કોમ્પ્લેક્સ વિશ્વ કક્ષાના આંતરરાષ્ટ્રીય પ્રવાસન સ્થળ તરીકે ઉભરશે એવી આશા સેવાઇ રહી છે.
આ પ્રોજેક્ટથી સ્થાનિક લોકોને રોજગારી પણ ઉપલબ્ધ થશે. હડપ્પન આર્કિટેક્ચર અને જીવનશૈલીને ફરીથી ઉજાગર કરવા માટે લોથલ મિની રિક્રિએશન, ચાર થીમ પાર્ક મેમોરિયલ થીમ પાર્ક, મેરિટાઇમ અને નેવી થીમ પાર્ક, ક્લાઇમેટ થીમ પાર્ક અને એડવેન્ચર એન્ડ એમ્યુઝમેન્ટ થીમ પાર્ક જેવી સુવિધાઓ ઊભી થશે. વિશ્વનું ઊંચું લાઇટહાઉસ મ્યુઝિયમ હશે, હડપ્પન સમયથી શરૂ કરીને આજ સુધીના ભારતના સમુદ્રી વારસા પર પ્રકાશ પાડતી 14 ગેલેરીઓ તેમજ અન્ય રાજ્યો અને કેન્દ્રશાસિત પ્રદેશોના વિવિધ સમુદ્રી વારસાને પ્રદર્શિત કરતું કોસ્ટલ સ્ટેટ્સ પેવેલિયન પણ હશે.
લોથલ શહેર – ઐતિહાસિક લોથલ શહેરનું રિક્રિએશન જોવા મળશે.
- ક્યાં બનશે ? લોથલ ખાતે
- કેવી રીતે જઇ શકાય? બગોદરા થઇ રોડ મારફતે
- નજીકમાં એરપોર્ટ – અમદાવાદ
- અંતર – અમદાવાદથી 75 કિમી દૂર
એક સમયે લોથલ બંદર પર 84 દેશના ધ્વજ જોવા મળતા
લોથલ, હડપ્પન સંસ્કૃતિ સમયના અગ્રણી શહેરોમાંનું એક હતું અને 5000 વર્ષ જૂના માનવસર્જિત ડોકયાર્ડની શોધ માટે તે જાણીતું છે. નેશનલ મેરિટાઇમ હેરિટેજ કોમ્પ્લેક્સ ભારતના વૈવિધ્યસભર સમુદ્રી ઇતિહાસને શીખવા અને સમજવા માટે કેન્દ્ર તરીકે કાર્ય કરશે. હેરિટેજ કોમ્પ્લેક્સનું નિર્માણ એ રીતે કરવામાં આવી રહ્યું છે કે ભારતનો સામાન્ય માણસ તેનો ઇતિહાસ સરળતાથી સમજી શકે. લોથલ માત્ર સિંધુ ખીણની સંસ્કૃતિનું મુખ્ય વેપાર કેન્દ્ર જ ન હતું, પરંતુ તે ભારતની સમુદ્રી શક્તિ અને સમૃદ્ધિનું પ્રતીક પણ હતું. એક સમય એવો હતો જ્યારે લોથલ બંદર 84 દેશોના ધ્વજથી ચિહ્નિત હતું અને વલભી 80 દેશોના વિદ્યાર્થીઓનું ઘર હતું.
ગ્રાફિકલ નક્શો… નેશનલ મેરિટાઇમ હેરિટેજ કોમ્પ્લેક્સમાં આ આકર્ષણ હશે
લાઇટહાઉસ મ્યુઝિયમ :- દુનિયાનું સૌથી ઊંચુ (77 મીટર) અદ્વિતીય લાઇટહાઉસ મ્યુઝિયમ હશે. 60 મીટરની ઊંચાઇએ વ્યુઇંગ ગેલેરી હશે. જ્યાંથી આખા સંકુલને જોઇ શકાશે.
અન્ડર વૉટર થીમિંગ :- કોમ્પ્લેક્સની અંદર પાણી માર્ગે અવર જવરની પણ વ્યવસ્થા
ઇન્સ્ટિટ્યુટ અને હોસ્ટેલ; મોન્યુમેન્ટ થીમ પાર્ક 5-ડી ડોમ થિએટર
બગીચા કોમ્પલેક્સ :- લોથલની મુલાકાત વખતે એક ભવ્ય બગીચાની સફર પણ માણી શકાશે. વિશ્વ કક્ષાના એડવેન્ચર અને એમ્યુઝમેન્ટ પાર્ક, મ્યુઝિયમની થીમ પર બે હોટેલ જે મ્યુઝિયોટેલ તરીકે ઓળખાશે, 100 રૂમનો ઇકો રિસોર્ટ
14 ગેલેરી :- હડપ્પન સમયથી શરૂ કરીને આજ સુધીના પાંચ હજાર વર્ષના ભારતના સમુદ્રી વારસાનો ઇતિહાસ રજૂ કરશે. દરેક ગેલેરીમાં લોકોને સંશોધન આધારિત નવી જ બાબતો જાણવા મળશે. દરેક ગેલેરીમાં ગ્રાફિક્સ, ઓડિયો-વિઝ્યુઅલ સહિત વિવિધ ટેકનોલોજી દ્વારા લોકોને અલગ અનુભૂતિ કરાવશે.
નેવી ગેલેરી :- આઇએનએસ નિશંક સહિત દરિયાઇ હૅરિઅર જેટ્સ, ચોપર્સ હશે. 35 એકરમાં નેવી ગેલેરીનું નિર્માણ થઇ રહ્યું છે.
