બજાર હિસ્સાની દૃષ્ટિએ ભારતની સૌથી મોટી એરલાઇન ઇન્ડિગો નવેમ્બરથી કેટલીક સ્થાનિક ફ્લાઇટ્સ પર બિઝનેસ ક્લાસની સુવિધા આપવાનું શરૂ કરશે. કંપનીએ બુકિંગ માટે એક નવું ટેબ પણ રજૂ કર્યું છે. તેનું બુકિંગ આવતીકાલ (6 ઓગસ્ટ)થી શરૂ થશે.
કંપનીના CEO પીટર આલ્બર્સે કહ્યું કે, બિઝનેસ ક્લાસ દિલ્હી-મુંબઈ રૂટથી શરૂ થશે. એરલાઇન દેશની અંદર 12 રૂટ પર બિઝનેસ ક્લાસ કેબિન શરૂ કરશે. જેમાં બેંગલુરુ, ચેન્નાઈ, કોલકાતા અને હૈદરાબાદ જેવા શહેરોનો સમાવેશ થાય છે.
ગયા અઠવાડિયે કંપનીએ તેના પ્રથમ ત્રિમાસિક પરિણામો જાહેર કર્યા. આ દરમિયાન એરલાઇનના CEOએ કહ્યું કે, એરલાઇન ભારતના સૌથી વ્યસ્ત રૂટ પર બિઝનેસ ક્લાસ શરૂ કરવા જઈ રહી છે.
આ ઉપરાંત, કેટલાક ડોમેસ્ટિક રૂટ પર ઇનફ્લાઇટ એન્ટરટેઇનમેન્ટ પણ શરૂ કરવાની તૈયારી કરવામાં આવી રહી છે. આ સિવાય ભારત અને મધ્ય એશિયા વચ્ચેની ફ્લાઈટ્સ પણ ઓગસ્ટથી શરૂ થવા જઈ રહી છે.
નાણાકીય વર્ષ 2024-25 ના પ્રથમ ક્વાર્ટર (જાન્યુઆરી-માર્ચ) માં ઓછી કિંમતની એરલાઇન ઇન્ડિગોનો નફો 2,729 કરોડ રૂપિયા હતો. તેમાં વાર્ષિક ધોરણે (YoY) 12%નો ઘટાડો થયો છે. એક વર્ષ અગાઉના સમાન ક્વાર્ટરમાં કંપનીનો કોન્સોલિડેટેડ ચોખ્ખો નફો રૂ. 3,091 કરોડ હતો.
ઈન્ડિગોની કામગીરીમાંથી એકીકૃત આવક વાર્ષિક ધોરણે 17% વધી છે. Q1FY25માં કામગીરીમાંથી આવક રૂ. 19,571 કરોડ હતી. એક વર્ષ અગાઉના સમાન ક્વાર્ટરમાં એટલે કે FY24 ના પ્રથમ ક્વાર્ટરમાં આવક રૂ. 16,683 કરોડ હતી.
- 30 જૂન 2024 સુધીમાં, ઈન્ડિગો પાસે તેના કાફલામાં 382 એરક્રાફ્ટ હતા. ક્વાર્ટર દરમિયાન પેસેન્જર એરક્રાફ્ટમાં 15નો વધારો થયો છે.
- IndiGo એ ત્રિમાસિક ગાળા દરમિયાન મહત્તમ 2,029 દૈનિક ફ્લાઇટ્સનું સંચાલન કર્યું હતું, જેમાં નોન-શિડ્યુલ ફ્લાઇટ્સનો સમાવેશ થાય છે.
- ક્વાર્ટર દરમિયાન, 88 સ્થાનિક સ્થળો અને 30 આંતરરાષ્ટ્રીય સ્થળોને સુનિશ્ચિત સેવાઓ પ્રદાન કરવામાં આવી હતી.
- રૂ. 36100.6 કરોડની રોકડ રકમ હતી. રૂ. 22087.6 કરોડ મફત રોકડ અને રૂ. 14,013 કરોડ પ્રતિબંધિત રોકડ છે.
- ઈન્ડિગોનું ચાર મુખ્ય મહાનગરોમાં સમયસર કામગીરી 74.8% હતી અને ફ્લાઇટ કેન્સલેશન રેટ 1.1% હતો.
- આ ક્વાર્ટરમાં ઈન્ડિગો દ્વારા 2.45 કરોડ સ્થાનિક મુસાફરોએ મુસાફરી કરી હતી. માર્કેટ શેર 61% રહ્યો.
