ઉત્તર સિક્કિમના ચુંગથાંગમાં શુક્રવારે ભૂસ્ખલન અને વરસાદથી એક માર્ગ ધોવાઈ ગયો. જેના કારણે ત્યાં ફસાયેલા લગભગ 3,500 પ્રવાસીઓને ભારતીય સેનાએ બચાવી લીધા છે. આમાં કેટલાક કોલેજના વિદ્યાર્થીઓ પણ સામેલ છે. શુક્રવારે લાચેન, લાચુંગ અને ચુંગથાંગ ઘાટીમાં ભારે વરસાદ થયો હતો.
રોડ કનેક્ટિવિટી પુનઃસ્થાપિત કરવાના પ્રયાસો ચાલુ છે, જ્યારે પ્રવાસીઓનું સ્થળાંતર ચાલુ રહેશે.
રાત્રે કામચલાઉ ક્રોસિંગ બનાવ્યું
ત્રિશક્તિ કોર્પ્સ, ભારતીય સેના અને બોર્ડર રોડ ઓર્ગેનાઈઝેશન (BRO)ના સૈનિકો એક્શનમાં આવ્યા અને ભારે વરસાદ અને પ્રતિકૂળ હવામાનમાં પ્રવાસીઓને બચાવવા માટે ફ્લડ સાઇટ પર કામચલાઉ ક્રોસિંગ બનાવવા માટે રાતભર કામ કર્યું. વિસ્તારમાં તંબુ ગોઠવવામાં આવી રહ્યા છે અને તબીબી સહાય માટે પોસ્ટ બનાવવામાં આવી છે. પ્રવાસીઓને તેમની આગળની યાત્રા માટે રસ્તો સાફ ન થાય ત્યાં સુધી તમામ શક્ય મદદ આપવામાં આવશે.
સેનાએ પ્રવાસીઓને નદી પાર કરવામાં મદદ કરી. તેમને ગરમ ખોરાક, તંબુ અને તબીબી સહાય આપવામાં આવી હતી. ભારતીય સેના પ્રવાસીઓ અને સ્થાનિક વસતિને મદદ કરવા માટે સક્રિય છે, હિમાલયના ઊંચાઈવાળા વિસ્તારોમાં સરહદની રક્ષા કરે છે.
સિંગતમ, ડિક્ચુ, રંગરાન, મંગન અને ચુંગથાંગને જોડતો માર્ગ ભૂસ્ખલનથી ખરાબ રીતે પ્રભાવિત થયો હતો. રાકડુંગ-ટિંટેક માર્ગ દ્વારા ડિક્ચુથી ગંગટોક માર્ગ ફક્ત હળવા વાહનો માટે ખુલ્લો છે. સ્થાનિક પ્રશાસને ફસાયેલા પ્રવાસીઓની માહિતી માટે હેલ્પલાઇન નંબર 8509822997 પણ જારી કર્યો છે.
