ચીનના હાંગઝોઉમાં ચાલી રહેલી 19મી એશિયન ગેમ્સના ચોથા દિવસે બુધવારે ભારતને અત્યાર સુધીમાં 4 મેડલ મળ્યા છે. જેમાંથી 2 ગોલ્ડ, એક સિલ્વર અને એક બ્રોન્ઝ મળ્યો છે. શિફ્ટ કૌરે 50 મીટર એર રાઈફલ 3 પોઝિશનમાં વર્લ્ડ રેકોર્ડ 469.6ના સ્કોર સાથે ગોલ્ડ જીત્યો હતો. આશી ચૌકસેએ બ્રોન્ઝ મેડલ જીત્યો હતો.
આ પહેલા ભારતીય શૂટર્સ મનુ ભાકર, ઈશા સિંહ અને રિદ્દમ સાંગવાને 25 મીટર રેપિડ પિસ્તોલમાં ગોલ્ડ મેડલ જીત્યો હતો. બીજી તરફ 50 મીટર એર રાઈફલ થ્રી પોઝિશનમાં ભારતીય મહિલા ટીમ શિફ્ટ કૌર, મિની કૌશિક અને આશી ચોકસેએ સિલ્વર મેડલ જીત્યો હતો. એશિયન ગેમ્સમાં અત્યાર સુધી ભારતે 18 મેડલ જીત્યા છે.
ભારતે અત્યાર સુધીમાં 18 મેડલ જીત્યા
એશિયન ગેમ્સમાં ભારતે અત્યાર સુધીમાં 18 મેડલ જીત્યા છે. તેમાંથી 5 ગોલ્ડ છે. જેમાં શૂટિંગમાં 3 ગોલ્ડ જીત્યા છે. ઘોડેસવાર ટીમ ઈવેન્ટમાં એક ગોલ્ડ જીત્યો. આ સાથે જ મહિલા ક્રિકેટ ટીમે પણ ગોલ્ડ જીત્યો હતો. આ સિવાય ભારતને 5 સિલ્વર મળ્યા છે. જેમાં શૂટિંગમાં 2, રોઇંગમાં 2 અને સેલિંગમાં 1નો સમાવેશ થાય છે. રોઇંગમાં 3 અને શૂટિંગમાં 4 બ્રોન્ઝ મેડલ જીત્યા છે, જ્યારે એક સેઇલિંગમાં આવ્યો છે.
શૂટિંગ: એક ગોલ્ડ, એક સિલ્વર
25 મીટર રેપિડ ફાયરમાં મનુ ભાકર, ઈશા સિંહ અને રિધમ સાંગવાને 1759નો સ્કોર કર્યો અને ચોથા દિવસે પહેલો ગોલ્ડ મેળવ્યો. આ ઈવેન્ટમાં ચીનની ટીમ 1756ના સ્કોર સાથે બીજા ક્રમે રહી અને સિલ્વર મેડલ જીત્યો.દક્ષિણ કોરિયાએ 1742ના સ્કોર સાથે બ્રોન્ઝ જીત્યો.
50 મીટર એર રાઇફલ 3 પોઝિશન્સમાં, શિફ્ટ કૌર, મિની કૌશિક અને આશી ચોકસેની ભારતીય મહિલા ટીમે 1764ના સ્કોર સાથે સિલ્વર જીત્યો હતો. આ ઈવેન્ટમાં ચીનની ટીમે 1773ના સ્કોર સાથે ગોલ્ડ જ્યારે દક્ષિણ કોરિયાએ 1756ના સ્કોર સાથે બ્રોન્ઝ મેડલ જીત્યો હતો.
હવે શૂટિંગમાં 9 મેડલ
હવે શૂટિંગમાં 9મેડલ છે જેમાંથી 2 ગોલ્ડ છે. ચોથા દિવસે 27 સપ્ટેમ્બરે મહિલા ટીમની મનુ ભાકર, ઈશા સિંહ અને રિધમ સાંગવાને 25 મીટર રેપિડ ફાયરમાં ગોલ્ડ જીત્યો હતો અને 25 સપ્ટેમ્બરે દિવ્યાંશ સિંહ પંવાર, ઐશ્વર્ય પ્રતાપ સિંહ તોમર અને રુદ્રાક્ષ પાટીલે 25 મીટર રેપિડ ફાયરમાં ગોલ્ડ જીત્યો હતો.
તેમજ, શૂટિંગમાં અત્યાર સુધીમાં 2 સિલ્વર અને 3 બ્રોન્ઝ જીત્યા છે. 10 મીટર એર રાઈફલ ટીમ રમિતા, આશી ચોકસે, મેહુલી ઘોષે 24 સપ્ટેમ્બરે સિલ્વર મેડલ જીત્યો હતો. 27 સપ્ટેમ્બરના રોજ, શિફ્ટ કૌર, મિની કૌશિક અને આશી ચોકસેએ 50 મીટર રાઇફલ થ્રી પોઝિશનમાં સિલ્વર જીત્યો હતો.
આ સિવાય 24 સપ્ટેમ્બરે રમિતાએ 10 મીટર એર રાઈફલમાં બ્રોન્ઝ જીત્યો હતો. જ્યારે 25 સપ્ટેમ્બરે ઐશ્વર્ય પ્રતાપ સિંહ તોમરે 10 મીટર એર રાઈફલ વ્યક્તિગત ઈવેન્ટમાં બ્રોન્ઝ જીત્યો હતો. 25 સપ્ટેમ્બરે જ આદર્શ સિંહ, અનીશ સિદ્ધુ અને વિજયવીરની ત્રિપુટીએ 25 મીટર એર પિસ્તોલ રેપિડ ફાયર ઇવેન્ટમાં બ્રોન્ઝ મેડલ જીત્યો હતો.
આજે 19 રમતોમાં 148 ખેલાડીઓ મેદાનમાં ઉતરશે
આજે ગેમ્સમાં ભારતના 148 ખેલાડીઓ 19 રમતોમાં ભાગ લેશે. તેમાંથી, મહત્તમ 20 બાસ્કેટબોલમાંથી હશે, જ્યારે સૌથી ઓછા જિમ્નેસ્ટિક્સમાંથી હશે.
ચોથા દિવસે મેડલ
- શૂટર : ભારતીય શૂટર્સ આજે બે કે તેથી વધુ મેડલ જીતી શકે છે. રાઈફલ, સ્કીટ અને પિસ્તોલની ત્રણેય શાખાઓમાં સ્પર્ધાઓ યોજાશે. મનુ ભાકર ફાઈનલ મેચમાં ભાગ લેશે. 25 મીટર પિસ્તોલ ટીમ પાસેથી મેડલની અપેક્ષા છે. મેડલ રેપિડ ફાયરમાં પણ આવી શકે છે.
- ઘોડેસવાર : એક દિવસ પહેલા મંગળવારે, ભારતીય ઘોડેસવારોએ ડ્રેસેજની ટીમ ઈવેન્ટમાં ગોલ્ડ જીત્યો છે. આજે ઈંજિવિજુઅલ ડ્રેસેજ સ્પર્ધાઓ છે. આવી સ્થિતિમાં ટીમ ઈવેન્ટના ગોલ્ડ મેડલિસ્ટ હજુ પણ મેડલ મેળવી શકે છે.
- સેલર : આજે ચાર સેલિંગ ઇવેન્ટની ફાઇનલ હશે. ભારતીય ખલાસીઓ આમાં મેડલ મેળવી શકે છે.
ત્રીજા દિવસના પરિણામો: ઘોડેસવારોએ ગોલ્ડ જીત્યો
ત્રણ દિવસની સ્પર્ધાઓ બાદ ભારતીય ટીમ મેડલ ટેલીમાં છઠ્ઠા સ્થાને છે. ભારતીય ખેલાડીઓએ અત્યાર સુધીમાં ત્રણ ગોલ્ડ જીત્યા છે. ભારતીય ટીમના ખાતામાં 14 મેડલ આવી ગયા છે.
મંગળવારે ગેમ્સના ત્રીજા દિવસે ભારતને 3 મેડલ મળ્યા છે. ઘોડેસવારી ટીમે દિવસનો પ્રથમ ગોલ્ડ જીત્યો હતો. સુદીપ્તિ હજેલા, દિવ્યકૃતિ સિંહ, હૃદય છેડા અને અનુષ અગ્રવાલાની જોડીએ આ ઈવેન્ટમાં 41 વર્ષ બાદ દેશ માટે ગોલ્ડ જીત્યો હતો.
ભારતના ઇબાદ અલીએ પુરુષોની સેલિંગમાં બ્રોન્ઝ મેડલ જીત્યો હતો. તેના પહેલા નેહા ઠાકુરે 28 પોઈન્ટ સાથે મહિલા સેઈલીંગમાં સિલ્વર મેડલ જીત્યો હતો.
ઘોડેસવારી: 41 વર્ષ પછી ગોલ્ડ મેડલ
ભારતે ઘોડેસવારીની ટીમ ડ્રેસેજ ઈવેન્ટમાં ઐતિહાસિક ગોલ્ડ મેડલ જીત્યો હતો. સુદીપ્તિ હજેલા, દિવ્યકૃતિ સિંહ, હૃદય છેડા અને અનુષ અગરવલ્લાની જોડીએ 41 વર્ષ બાદ દેશ માટે ઘોડેસવારીમાં ગોલ્ડ મેડલ જીત્યો છે. આ પહેલા દેશે 1982માં ઘોડેસવારીમાં ગોલ્ડ જીત્યો હતો.
સેલિંગ- એક બ્રોન્ઝ અને એક સિલ્વર
ઇબાદ અલીએ મેન્સ સેલિંગમાં બ્રોન્ઝ મેડલ જીત્યો હતો અને નેહા ઠાકુરે મહિલા સેલિંગમાં સિલ્વર મેડલ જીત્યો હતો.
હોકી- ભારતે સિંગાપોરને મેડલની રેસમાંથી બહાર કરી દીધું
એશિયન ગેમ્સમાં ત્રીજા દિવસે મંગળવારે ભારતે હોકીમાં સિંગાપોરને 16-1થી હરાવીને સારી શરૂઆત કરી હતી. ભારત તરફથી હરમનપ્રીત સિંહે 4 અને મનદીપ સિંહે 3 ગોલ કર્યા હતા. આ સિવાય વરુણ કુમાર અને અભિષેકે 2-2 ગોલ કર્યા હતા.
