તાઈવાનની ઈલેક્ટ્રોનિક્સ મેન્યુફેક્ચરિંગ કંપની ફોક્સકોન ભારતમાં 1.6 બિલિયન ડોલર એટલે કે લગભગ 13 હજાર કરોડ રૂપિયાથી વધુનું રોકાણ કરશે. કંપનીએ સોમવારે મોડી રાત્રે તાઇવાનમાં એક એક્સચેન્જ ફાઇલિંગમાં આની જાહેરાત કરી હતી. કંપનીએ કહ્યું કે કન્સ્ટ્રક્શન પ્રોજેક્ટ માટે પ્લાન બનાવવામાં આવી રહ્યો છે. આ રોકાણ ઓપરેશનલ જરૂરિયાતો માટે કરવામાં આવશે. આ સિવાય ફોક્સકોને ક્યાં અને કેવી રીતે રોકાણ કરવામાં આવશે તેની વિગતો શેર કરી નથી.
ફોક્સકોન ભારતમાં બમણી નોકરીઓ આપશે
કંપનીના પ્રતિનિધિ વેઈ લીએ વડાપ્રધાન મોદીને તેમના 73મા જન્મદિવસની શુભેચ્છા પાઠવતા કહ્યું હતું કે, ‘ફોક્સકોને ભારતમાં તેના કર્મચારીઓ અને રોકાણને બમણું કરવાની યોજના બનાવી છે.’ તેમણે LinkedIn પર લખ્યું, ‘તમારા નેતૃત્વમાં, ફોક્સકોન ભારતમાં ઝડપથી વિકસ્યું છે. ભારતમાં રોજગાર, એફડીઆઈ અને બિઝનેસનું કદ બમણું કરવાનો લક્ષ્યાંક રાખીને અમે આવતા વર્ષે તમને જન્મદિવસની મોટી ભેટ આપવા માટે વધુ સખત મહેનત કરીશું.
કંપની તમિલનાડુ પ્લાન્ટમાં 40,000 લોકોને નોકરી આપે છે
મીડિયા રિપોર્ટ્સ અનુસાર, ફોક્સકોનના તમિલનાડુ પ્લાન્ટમાં હાલમાં 40,000 લોકો કામ કરે છે. તે જ સમયે, ગયા વર્ષે રોઇટર્સે અહેવાલ આપ્યો હતો કે ફોક્સકોન આગામી બે વર્ષમાં 53,000 લોકોને નોકરી પર રાખવાની યોજના બનાવી રહી છે.
ફોક્સકોન ભારત સરકારની PLI યોજનાનો ભાગ
એપલના ત્રણેય કોન્ટ્રાક્ટ ઉત્પાદકો (ફોક્સકોન, વિસ્ટ્રોન અને પેગાટ્રોન) ભારત સરકારની રૂ. 41,000 કરોડની પ્રોડક્શન-લિંક્ડ ઇન્સેન્ટિવ સ્કીમ (PLI)નો ભાગ છે. આ સ્કીમ પછી જ ભારતમાં આઈફોનનું ઉત્પાદન વધ્યું છે. 2020 માં, ભારત સરકારે PLI યોજના શરૂ કરી. આ યોજના દ્વારા, બહારના દેશોની કંપનીઓને સ્થાનિક ઉત્પાદનનો લાભ લેવાની તક મળે છે અને તેના પર પ્રોત્સાહન પણ મળે છે.
એપલનું મેન્યુફેક્ચરિંગ ચીનમાંથી ભારતમાં શિફ્ટ કરવામાં આવી રહ્યું છે
અમેરિકા અને ચીન વચ્ચે વધતા તણાવને કારણે એપલનું મેન્યુફેક્ચરિંગ ચીનમાંથી ભારતમાં શિફ્ટ કરવામાં આવી રહ્યું છે. ભૌગોલિક રાજકીય તણાવ અને કોરોના રોગચાળા પછી, Apple સહિત અન્ય અમેરિકન ટેક જાયન્ટ્સ પણ ચીનની બહાર તેમની ઉત્પાદન સુવિધાઓના વિસ્તરણ પર કામ કરી રહી છે.
ફોક્સકોન કાંચીપુરમમાં મોબાઈલ કમ્પોનન્ટ પ્લાન્ટ સ્થાપશે
ફોક્સકોન તમિલનાડુમાં મોબાઈલ કમ્પોનન્ટ પ્લાન્ટ સ્થાપશે. આ માટે તાઈવાનના હોન હૈ ટેક્નોલોજી ગ્રુપ (ફોક્સકોન) એ બે મહિના પહેલા રાજ્ય સરકાર સાથે લેટર ઓફ ઈન્ટેન્ટ (LOL) પર હસ્તાક્ષર કર્યા છે. આ પ્લાન્ટ 1,600 કરોડના ખર્ચે કાંચીપુરમ જિલ્લાના શ્રીપેરુમ્બુદુરમાં ફોક્સકોનના હાલના iPhone પ્લાન્ટની નજીક સ્થાપિત કરવામાં આવશે.
ફોક્સકોન ભારતમાં 4-5 સેમિકન્ડક્ટર પ્લાન્ટ સ્થાપવા માંગે છે
ફોક્સકોન ભારતમાં 4-5 સેમિકન્ડક્ટર ચિપ મેન્યુફેક્ચરિંગ યુનિટ સ્થાપવા માંગે છે. ફોક્સકોને વેદાંત સાથેનું સંયુક્ત સાહસ તોડ્યાના એક દિવસ બાદ તેણે ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલયને તેની જાણ કરી હતી.
