રાજકોટના જેતપુર શહેરમાં એક સાવકા પિતાએ સગીર વયની પુત્રીની એકલતાનો લાભ લઇ તેણી સાથે દુષ્કર્મ આચર્યું હોવાનું સામે આવ્યું છે. સગીરાએ સમગ્ર બનાવ અંગે પોતાની માતાને જાણ કરતા માતાએ સીટી પોલીસમાં આરોપી પતિ સામે પોકસો હેઠળ ફરીયાદ નોંધાવી છે.
સાવકા પિતાએ સગીરા પર દુષ્કર્મ આચર્યું
જેતપુર શહેર પોલીસ સ્ટેશનમાં એક મહિલાએ નોંધાવેલી ફરિયાદમાં જણાવ્યું હતું કે, તેણીને સંતાનમાં એક 13 વર્ષની દીકરી છે. આ દીકરીના પિતા સાથે તેણીને અણબનાવ બનતા છૂટાછેડા થઈ ગયા હતા અને થોડા સમય પૂર્વે તેણીએ બીજા પુરુષ સાથે ફરી લગ્ન કરેલા હતાં અને તેની સાથે જ આગલા ઘરની પુત્રી સાથે રહેતી હતી. ત્રણ દિવસ પૂર્વે મહિલાની તબિયત બગડતા તેણીને સારવાર માટે હોસ્પિટલમાં દાખલ કરવામાં આવી હતી. જેમાં મહિલા રાત્રિ દરમિયાન હોસ્પિટલ હતી ત્યારે પુત્રી અને સાવકો પિતા ઘરે એકલા હતા અને એકલતાનો લાભ લઇ નરાધમ સાવકા પિતાએ તેણી સાથે દુષ્કર્મ આચર્યું હતું..
માતાએ ફરિયાદ નોંધાવી
બીજા દિવસે સગીરાની માતા હોસ્પિટલથી ઘરે પરત આવતા તેણીએ સાવકા બાપના કૃત્ય વિશે માતાને વાત કરી હતી. જેથી આ મહિલાએ પતિને પુત્રી સાથે કરેલ દુષ્કર્મ વિશે પૂછતાં સાવકો પિતા લાજવાને બદલે ગાજવા લાગ્યો હતો અને ઝઘડો કરવા લાગ્યો હતો. જેથી મહિલા તરત જ પોલીસ સ્ટેશને ફરીયાદ કરવા પહોંચી હતી. પોલીસે મહિલાની ફરીયાદ પરથી પોકસો સહિતની કલમ હેઠળ ફરિયાદ નોંધી આરોપી સાવકા પિતાની ધરપકડ કરવા તજવીજ હાથ ધરી હતી.
