ભારત અને બાંગ્લાદેશ વચ્ચે બે મેચની ટેસ્ટ શ્રેણીની પ્રથમ મેચ ચેન્નઈમાં રમાઈ રહી છે. બીજા દિવસની શુક્રવારની રમતના અંત સુધીમાં ભારતે બીજા દાવમાં 3 વિકેટ ગુમાવીને 81 રન બનાવી લીધા હતા. ભારતે પ્રથમ દાવમાં 227 રનની લીડ લીધી હતી, હવે તેમની લીડ વધીને 308 રન થઈ ગઈ છે. રિષભ પંત 12 રન અને શુભમન ગિલ 33 રન બનાવીને અણનમ પરત ફર્યા હતા.
આ પહેલા બીજા દાવમાં રોહિત શર્મા 5 રન, યશસ્વી જયસ્વાલ 10 અને વિરાટ કોહલી 17 રન બનાવીને આઉટ થયા હતા. બાંગ્લાદેશ તરફથી અત્યાર સુધી મેહદી હસન મિરાજ, નાહિદ રાણા અને તસ્કીન અહેમદને 1-1 વિકેટ મળી છે.
આ પહેલાં, દિવસના પ્રથમ સેશનમાં ભારતીય ટીમ પ્રથમ દાવમાં 376 રનમાં ઓલઆઉટ થઈ ગઈ હતી. જેના જવાબમાં બાંગ્લાદેશની ટીમ પણ આજે ત્રીજા સેશનમાં પ્રથમ દાવમાં 149 રનમાં ઓલઆઉટ થઈ ગઈ હતી.
