આજે દેશમાં નવમા આંતરરાષ્ટ્રીય યોગ દિવસની ઉજવણી કરવામાં આવી રહી છે. ભારતીય સેનાના અધિકારીઓ અને જવાનોએ કાશ્મીરથી કન્યાકુમારી સુધી યોગ કર્યા હતા. રાજસ્થાનના રણમાં પણ સૈનિકોએ આસાનો કર્યા. આ વર્ષે યોગ દિવસની થીમ ‘વસુધૈવ કુટુંબકમ માટે યોગ’ છે. બીજી તરફ પીએમ મોદીએ અમેરિકાથી એક વીડિયો સંદેશમાં કહ્યું કે, ‘યોગ વૈશ્વિક આંદોલન બની ગયું છે.’
આ પ્રસંગે નેવીએ ‘ઓશન રિંગ ઓફ યોગા’ની રચના કરી હતી. ભારતીય નૌકાદળના 19 જહાજો પર સવાર લગભગ 3,500 ખલાસીઓએ રાષ્ટ્રીય અને આંતરરાષ્ટ્રીય જળમાં યોગના રાજદૂત તરીકે 35,000 કિમીનું અંતર કાપ્યું હતું.
બાંગ્લાદેશમાં ચટગાંવ, ઇજિપ્તમાં સફાગા, ઇન્ડોનેશિયામાં જકાર્તા, કેન્યામાં મોમ્બાસા, મેડાગાસ્કરમાં ટોમાસિના, ઓમાનમાં મસ્કત, શ્રીલંકામાં કોલંબો, થાઇલેન્ડમાં ફુકેટ અને સંયુક્ત આરબ અમીરાત (યુએઇ)માં દુબઇ ખાતે પોર્ટ કોલ્સ પર આ જહાજો હાજર હતા. અહીંથી તેમણે ‘ઓશન રિંગ ઓફ યોગા’ બનાવ્યું. જેમાં કિલ્ટન, ચેન્નાઈ, શિવાલિક, સુનયના, ત્રિશુલ, તર્કશ, વાગીર, સુમિત્રા અને બ્રહ્મપુત્રા જહાજોનો સમાવેશ થાય છે. બીજી તરફ દેશના વિવિધ રાજ્યોમાં પણ યોગના કાર્યક્રમોનું આયોજન કરવામાં આવી રહ્યું છે.
PM મોદી આજે સાંજે 5:30 વાગ્યે અમેરિકામાં યોગ કરશે
છેલ્લા આઠ વર્ષથી પીએમ મોદી લોકો વચ્ચે યોગ કરીને દેશમાં યોગ દિવસની ઉજવણી કરી રહ્યા છે. આ વખતે તેઓ અમેરિકાની સરકારી મુલાકાતે છે. આવી સ્થિતિમાં તેમણે સવારે એક વીડિયો સંદેશ જારી કરીને લોકોને યોગ દિવસની શુભકામનાઓ પાઠવી હતી.
પીએમએ કહ્યું કે તેઓ જવાબદારીઓને કારણે અમેરિકામાં છે. તેઓ અહીં ન્યુયોર્કમાં સંયુક્ત રાષ્ટ્ર (યુએન)ના મુખ્યાલયમાં યોજાનારા યોગ દિવસ કાર્યક્રમનું નેતૃત્વ કરશે. આ કાર્યક્રમ ભારતીય સમય અનુસાર સાંજે 5:30 વાગ્યે યુએન હેડક્વાર્ટરના નોર્થ લૉનમાં યોજાશે. તેમાં 177 દેશોના પ્રતિનિધિઓ ભાગ લઈ શકે છે.
પીએમએ કહ્યું, ‘દર વર્ષે યોગ દિવસના અવસર પર, હું એક યા બીજા કાર્યક્રમમાં તમારી વચ્ચે હાજર હોઉં છું. તમારી સાથે યોગ કરવાનો આનંદ યાદગાર રહેશે. પરંતુ વિવિધ જવાબદારીઓને કારણે હું હાલમાં અમેરિકામાં છું. એટલા માટે હું વીડિયો મેસેજ દ્વારા તમારી સાથે જોડાઈ રહ્યો છું.
હું અત્યારે તમારી વચ્ચે યોગ કરવા સક્ષમ નથી, પણ હું યોગ કરવાના કાર્યક્રમમાંથી ભાગી રહ્યો નથી. એટલા માટે આજે ભારતીય સમય અનુસાર સાંજે 5.30 કલાકે સંયુક્ત રાષ્ટ્ર એટલે કે UNના મુખ્યાલયમાં એક વિશાળ કાર્યક્રમ થઈ રહ્યો છે. હું તેમાં જોડાઈશ.
ભારતના આહ્વાન પર 180થી વધુ દેશોનું એકઠા થવું એ ઐતિહાસિક અને અભૂતપૂર્વ છે. એ યાદ રહેશે કે 2014માં યુએન જનરલ એસેમ્બલીમાં યોગનો પ્રસ્તાવ આવ્યો ત્યારે રેકોર્ડ દેશોએ તેનું સમર્થન કર્યું હતું. ત્યારથી યોગ એક વૈશ્વિક ચળવળ બની ગઈ છે. વૈશ્વિક ભાવના બની ગઈ છે.
યુએન સેક્રેટરી જનરલે કહ્યું- યોગ લોકોને જોડે છે
યોગ દિવસના એક દિવસ પહેલા યુએન સેક્રેટરી-જનરલ એન્ટોનિયો ગુટેરેસે કહ્યું હતું કે યોગ માત્ર શરીર અને મનને જ નહીં, પરંતુ વિશ્વભરના લાખો લોકોને પણ જોડે છે. તે ચિંતા ઘટાડે છે અને માનસિક સ્વાસ્થ્યને સુધારવામાં મદદ કરે છે.
અહીં નેવી ચીફ એડમિરલ આર.કે. હરિ કુમાર, તેમની પત્ની અને રક્ષા મંત્રાલય સાથે જોડાયેલા વરિષ્ઠ અધિકારીઓ હાજર રહેશે.
સુપ્રીમ કોર્ટમાં પણ યોગ દિવસની ઉજવણી કરવામાં આવશે
યોગ દિવસ નિમિત્તે સુપ્રીમ કોર્ટમાં પણ એક કાર્યક્રમનું આયોજન કરવામાં આવી રહ્યું છે. તેમાં મુખ્ય ન્યાયાધીશ ડીવાય ચંદ્રચુડ અને અન્ય ન્યાયાધીશો પણ હાજર રહેશે.
સુપ્રીમ કોર્ટ તરફથી નિવેદન જારી કરીને આ અંગેની માહિતી આપવામાં આવી છે. જોકે આ કાર્યક્રમમાં સામેલ થવા માટે કોઈના પર દબાણ નથી. આ દરમિયાન નિષ્ણાતોની દેખરેખ હેઠળ યોગના આસનો કરવામાં આવશે.
27 સપ્ટેમ્બર 2014ના રોજ, પ્રથમ વખત, વડા પ્રધાન મોદીએ સંયુક્ત રાષ્ટ્રમાં દર વર્ષે આંતરરાષ્ટ્રીય સ્તરે યોગ દિવસની ઉજવણી કરવાનો પ્રસ્તાવ મૂક્યો હતો, જે માત્ર ત્રણ મહિનામાં સ્વીકારવામાં આવ્યો હતો.
