જામનગર રોડ પરનાં ખંઢેરી ક્રિકેટ સ્ટેડિયમ ખાતે સૌરાષ્ટ્ર ક્રિકેટ એસો. આયોજિત સૌરાષ્ટ્ર પ્રીમિયર લીગ સિઝન-3 ચાલી રહી છે. જેમાં ગઈકાલે બીજી મેચ કચ્છ વોરિયર્સ અને સોરઠ લાયન્સ વચ્ચે રમાઈ હતી. આ મેચમાં સોરઠનાં કેપ્ટન ચિરાગ જાનીની ફીફ્ટી એળે ગઈ હતી અને કચ્છ વોરિયર્સની 30 રનથી જીત થઈ હતી. આજે બપોરે 3 કલાકે સોરઠ લાયન્સ અને ગોહિલવાડ ગ્લેડીએટર્સ તેમજ સાંજે 7 કલાકે ઝાલાવાડ રોયલ્સ અને હાલાર હિરોઝ વચ્ચે ટક્કર થશે.
સમર્થ વ્યાસ અને કેવિન જીવરાજાનીએ 23-23 રન બનાવ્યા
ગઈકાલે રમાયેલા મેચમાં કચ્છ વોરિયર્સે ટોસ જીતીને બેટિંગ કરવાનું પસંદ કર્યું હતું. કચ્છ વોરિયર્સે 20 ઓવરમાં 5 વિકેટ ગુમાવીને 151 રન બનાવ્યા હતા. આર્યનદેવસિંહ ઝાલાએ 28 બોલમાં 3 ચોગ્ગા અને 2 છગ્ગાની મદદથી 37 રન બનાવ્યા હતા. પાર્શ્વરાજ રાણાએ 22 બોલમાં 3 ચોગ્ગા અને એક છગ્ગાની મદદથી 36 રન બનાવ્યા હતા. સમર્થ વ્યાસ અને કેવિન જીવરાજાનીએ 23-23 રન બનાવ્યા હતા. સુકાની ચિરાગ જાની, સુરેશ પડિયાચી, કરણ સુચક અને જય ચૌહાણે 1-1 વિકેટ લીધી હતી.
કુશાંગ પટેલે 3.4 ઓવરમાં 27 રન આપીને 3 વિકેટ લીધી
બીજીતરફ સોરઠ લાયન્સની ટીમ 19.4 ઓવરમાં 121 રનમાં ઓલઆઉટ થઇ હતી. કેપ્ટન ચિરાગ જાનીએ 63 બોલમાં 4 ચોગ્ગા અને 3 છગ્ગાની મદદથી 65 રન બનાવ્યા હતા. તરંગ ગોહેલે 16 રન કર્યા. અંશ ગોસાઇએ 15 રન બનાવ્યા હતા. કુશાંગ પટેલે 3.4 ઓવરમાં 27 રન આપીને 3 વિકેટ લીધી હતી. ધર્માદિત્ય ગોહિલે 3 ઓવરમાં 18 રન આપીને 2 વિકેટ ઝડપી હતી. જ્યારે ધર્મેન્દ્રસિંહ જાડેજા, લકીરાજ વાઘેલા, પાર્શ્વરાજ રાણા અને જ્યોત છાયાએ 1-1 વિકેટ લીધી હતી.
તમામ મેચ જીઓ સિનેમા એપ પર લાઈવ
ઉલ્લેખનીય છે કે, આ મેચમાં હાથી સિમેન્ટ મજબૂત પ્લેયર ઓફ ધ મેચ ચિરાગ જાનીને આપવામાં આવ્યો હતો. એકસ્ટ્રીમ પ્લેયર ઓફ ધ મેચ પાર્શ્વરાજ રાણાને આપવામાં આવ્યો હતો. સ્કાયફેર ન્યૂઝ પ્લેયર ઓફ ધ મેચ પાર્શ્વરાજ રાણાને સૌરાષ્ટ્ર ક્રિકેટ એસોસિએશનનાં ખજાનચી શ્યામ રાયચુરા અને એપેક્ષ કાઉન્સિલ મેમ્બર ભૂપતસિંહ તલાતિયા દ્વારા એનાયત કરવામાં આવ્યો હતો. આ તમામ મેચ જીઓ સિનેમા એપ પર લાઈવ પ્રસારિત કરવામાં આવે છે.
