એશિયા કપમાં ભારતે શ્રીલંકાને 41 રને હરાવી ફાઈનલમાં જગ્યા બનાવી લીધી છે. ટીમના કેપ્ટન રોહિત શર્માએ 53 રન બનાવ્યા, આ સાથે તેણે વન-ડે ક્રિકેટમાં 10 હજાર રન પણ પૂરા કર્યા. એશિયા કપમાં આ તેનો 10મો ફિફ્ટી પ્લસ સ્કોર હતો, જેણે આ મામલે સચિન તેંડુલકરને પાછળ છોડી દીધો હતો.
ભારત અને શ્રીલંકા વચ્ચેની મેચમાં કુલ 8 રેકોર્ડ બન્યા હતા. આ સ્ટોરીમાં આપણે તે રેકોર્ડ્સ વિશે જાણીશું…
1. જાડેજા એશિયા કપમાં ભારતનો ટોપ બોલર બન્યો
રવીન્દ્ર જાડેજાએ શ્રીલંકા સામે 2 વિકેટ લીધી હતી. આ સાથે તેણે વન-ડે એશિયા કપમાં 24 વિકેટ લીધી અને ટુર્નામેન્ટ ઈતિહાસમાં ભારતનો સૌથી સફળ બોલર બન્યો. તેણે લેફ્ટ આર્મ પેસ બોલર ઈરફાન પઠાણનો રેકોર્ડ તોડ્યો, જેણે 22 વિકેટ લીધી છે.
આ રેકોર્ડમાં કુલદીપ યાદવ ત્રીજા સ્થાને પહોંચી ગયો છે. તેણે શ્રીલંકા સામે 4 વિકેટ ઝડપી હતી, હવે તેની એશિયા કપમાં 19 વિકેટ છે. તેણે સચિન તેંડુલકરને પાછળ છોડી દીધો, જેની પાસે 17 વિકેટ છે.
2. શ્રીલંકાએ સતત 14મી મેચમાં વિરોધી ટીમને ઓલઆઉટ કરી
શ્રીલંકાએ સતત 14મી વન-ડેમાં વિપક્ષી ટીમને ઓલઆઉટ કરી દીધી. વિપક્ષી ટીમને ઓલઆઉટ કરવાનો વર્લ્ડ રેકોર્ડ શ્રીલંકાના નામે છે. બીજા સ્થાને રહેલી ઓસ્ટ્રેલિયા અને દક્ષિણ આફ્રિકાએ 10-10 વખત વિરોધી ટીમને ઓલઆઉટ કરી છે.
3. પહેલીવાર ભારતની તમામ 10 વિકેટ સ્પિનર્સે લીધી
ટીમ ઈન્ડિયા 213 રન બનાવીને 49.1 ઓવરમાં ઓલઆઉટ થઈ ગઈ હતી. વન-ડેના ઈતિહાસમાં પ્રથમ વખત ટીમે સ્પિનર્સ સામે તમામ 10 વિકેટ ગુમાવી દીધી હતી. શ્રીલંકાના લેફ્ટ આર્મ સ્પિનર દુનિથ વેલ્લાગેએ 5 અને ઑફ સ્પિનર ચરિથ અસલંકાએ 4 વિકેટ ઝડપી હતી. મિસ્ટ્રી સ્પિનર મહિશ થિક્સાનાએ એક વિકેટ મળી હતી.
આ પહેલા ભારતે 1997માં શ્રીલંકા સામેની વન-ડેમાં એક ઇનિંગમાં સ્પિનરો સામે 9 વિકેટ ગુમાવી હતી. શ્રીલંકાના સ્પિનરોએ કોલંબોના મેદાન પર પોતાનો રેકોર્ડ સુધાર્યો અને તમામ 10 વિકેટો ઝડપી છે.
4. સૌથી ઝડપી 1000 રનની ઓપનિંગ ભાગીદારી
રોહિત શર્મા અને શુભમન ગીલે 80 રનની ઓપનિંગ ભાગીદારી કરી હતી. આ સાથે જ બંને વચ્ચે માત્ર 12 ઇનિંગ્સમાં એક હજાર રનની કુલ ભાગીદારી થઈ ગઈ છે. આ ઓપનિંગ પાર્ટનરશિપે પાકિસ્તાનના ફખર ઝમાન અને ઈમામ-ઉલહકનો રેકોર્ડ તોડ્યો, જેમણે 15 ઇનિંગ્સમાં એક હજાર રનની ભાગીદારી કરી હતી.
5. સૌથી ઝડપી 5000 રનની ભાગીદારી
શ્રીલંકા વિરૂદ્ધ રોહિત શર્મા અને વિરાટ કોહલી વચ્ચે માત્ર 10 રનની ભાગીદારી થઈ હતી, પરંતુ આ ભાગીદારીમાં બીજો રન લીધા બાદ તેમની વચ્ચે કુલ 5000 રનની ભાગીદારી પૂરી થઈ હતી. બંનેએ માત્ર 86 ઇનિંગ્સમાં આ સિદ્ધિ મેળવી હતી. રોહિત અને વિરાટે વેસ્ટઈન્ડિઝના ગોર્ડન ગ્રીનિજ અને ડેસમંડ હેન્સનો રેકોર્ડ તોડ્યો, જેમણે 97 ઇનિંગ્સમાં આવું કર્યું હતું.
6. એશિયા કપમાં રોહિતનો 10મો 50+ સ્કોર, સચિનને પાછળ છોડ્યો
રોહિત શર્માએ વન-ડેમાં સતત ત્રીજી અડધી સદી ફટકારી હતી. તેણે 48 બોલમાં 53 રન બનાવ્યા હતા. આ સાથે તે વન-ડે એશિયા કપમાં સૌથી વધુ ફિફ્ટી પ્લસ સ્કોર ધરાવનાર ભારતીય બન્યો છે. તેણે 9 ફિફ્ટી પ્લસ સ્કોર ધરાવતા સચિન તેંડુલકરનો રેકોર્ડ તોડ્યો છે. રોહિત શર્માએ એશિયા કપમાં કુલ 9 અડધી સદી અને એક સદી ફટકારી છે જ્યારે સચિને 7 અડધી સદી અને 2 સદી ફટકારી છે.
7. રોહિતે ઓપનર તરીકે 8 હજાર વન-ડે રન પૂરા કર્યા
રોહિત શર્માએ ઓપનર તરીકે 8 હજાર વન-ડે રન પણ પૂરા કર્યા. તેણે માત્ર 160 ઇનિંગ્સ રમી હતી, જે વિશ્વની સૌથી ઝડપી છે. તેણે સાઉથ આફ્રિકાના હાશિમ અમલાનો રેકોર્ડ તોડ્યો, જેણે ઓપનિંગ દરમિયાન 173 વન-ડે ઇનિંગ્સમાં 8 હજાર રન બનાવ્યા હતા.
8. રોહિત શર્માએ 10 હજાર વન-ડે રન પૂરા કર્યા
રોહિત શર્માએ પોતાની વન-ડે કરિયરમાં 10 હજાર રન પૂરા કર્યા. તેણે ઇનિંગ્સમાં 22મો રન બનાવતાની સાથે જ આ રેકોર્ડ બનાવ્યો હતો. તે 10 હજાર રન બનાવનાર છઠ્ઠો ભારતીય બન્યો હતો. તેના પહેલા માત્ર વિરાટ કોહલી, સચિન તેંડુલકર, સૌરવ ગાંગુલી, મહેન્દ્ર સિંહ ધોની અને રાહુલ દ્રવિડ જ આ કરી શક્યા હતા.
રોહિતે 10 હજાર રન બનાવવા માટે માત્ર 241 ઇનિંગ્સ લીધી, જે વિરાટ પછી વિશ્વમાં સૌથી ઝડપી છે. વિરાટે માત્ર 205 ઇનિંગ્સમાં 10 હજાર પૂરા કર્યા હતા.
