પશ્ચિમ બંગાળના 22 જિલ્લાઓની 73,887 ગ્રામ પંચાયત બેઠકોમાંથી 64,874 પર શનિવારે સવારે 7 વાગ્યાથી મતદાન ચાલી રહ્યું છે. સેન્ટ્રલ ફોર્સની તહેનાતી બાદ પણ અલગ-અલગ વિસ્તારોમાંથી આગચંપી-હિંસા અને બેલેટ પેપર સળગાવવાના અહેવાલો આવી રહ્યા છે. સવારે 11 વાગ્યા સુધી 23% મતદાન થયું છે.
છેલ્લા 24 કલાકમાં પાંચ જિલ્લામાં ચૂંટણી હિંસામાં આઠ લોકોના મોત થયા છે. માર્યા ગયેલા લોકોમાં પાંચ TMC કાર્યકર્તા, એક CPI(M) કાર્યકર, એક BJPનો કાર્યકર ઉમેદવારના પોલિંગ એજન્ટ અને અપક્ષ ઉમેદવારના પોલિંગ એજન્ટ સામેલ છે. 9 જૂનથી થયેલી હિંસક ઘટનાઓમાં મૃત્યુઆંક વધીને 18 થઈ ગયો છે.
મોટાભાગની અથડામણ અને હિંસા મુર્શિદાબાદ જિલ્લામાંથી નોંધાઈ છે. શનિવારે સવારે અહીંના બેલડાંગા અને તુફાનગંજમાં એક-એક વ્યક્તિનું મોત થયું હતું. આવી જ ઘટના શુક્રવારે રાત્રે રેજીનગરમાં બની હતી. અહીં બોમ્બ વિસ્ફોટમાં એક વ્યક્તિનું મોત થયું હતું. TMCએ દાવો કર્યો છે કે આ ત્રણ કાર્યકર્તા તેમની પાર્ટીના છે.
મતદાન અપડેટ્સ
- રાજ્યપાલ સીવી આનંદ બોઝે કહ્યું કે હું સવારથી મેદાનમાં બહાર છું. લોકોએ મને કહ્યું કે કેવી રીતે ગુંડાઓ તેમને મતદાન કરવા દેતા નથી. ચૂંટણી બુલેટથી નહીં પણ બેલેટથી થવી જોઈએ.
- પૂર્વ મેદિનીપુરના નંદીગ્રામ બ્લોક 1ના રહેવાસીઓએ ટીએમસી પર બૂથ કેપ્ચરિંગનો આરોપ લગાવીને ચૂંટણીનો બહિષ્કાર કર્યો હતો.
- લોકોનું કહેવું છે કે મહમદપુરના બૂથ નંબર 67 અને 68માં કેન્દ્રીય દળ તહેનાત કરવામાં આવે. તેઓ તે સિવાય મતદાન કરશે નહીં.
- શનિવારે વહેલી સવારે મુર્શિદાબાદના શમશેરગંજ વિસ્તારમાં ટીએમસી અને કોંગ્રેસના કાર્યકરો વચ્ચે અથડામણ થઈ હતી. જેમાં ટીએમસીના એક કાર્યકરને ગોળી વાગી હતી.
- માલદાના રતુઆ ચાંદમોની વિસ્તારમાં બોમ્બ વિસ્ફોટમાં મેઝારુલ હક નામનો યુવક ઘાયલ થયો હતો.
- હુગલીના આરામબાગમાં અપક્ષ ઉમેદવાર જહાંઆરા બેગમના એજન્ટ પર ટીએમસીના કાર્યકરોએ ગોળી મારી હતી.
- તૃણમૂલનો આરોપ છે કે કેન્દ્રીય દળના કર્મચારીઓ ઘણા મતદાન કેન્દ્રો પર લોકોને બીજેપીને મત આપવા માટે કહી રહ્યા છે.
- હુગલીના તારકેશ્વરમાં અપક્ષ ઉમેદવારની પુત્રીને ગોળી મારી દેવામાં આવી હતી. લોકોનો આરોપ છે કે ટીએમસી કાર્યકર્તાઓએ ગોળી મારી હતી.
બીજી તરફ ખરગ્રામ ગામમાં કોંગ્રેસના કાર્યકરને છરીના ઘા મારીને મોતને ઘાટ ઉતારી દેવાનો મામલો સામે આવ્યો છે. સવારે મતદાન શરૂ થતાની સાથે જ કૂચ બિહારના સીતાઈમાં બારાવિતા પ્રાથમિક શાળાના મતદાન મથકમાં તોડફોડ કરવામાં આવી હતી અને બેલેટ પેપરને આગ ચાંપી દેવામાં આવી હતી.
ચૂંટણી મતપત્રથી થવી જોઈએ, ગોળીઓથી નહીં…’
ઉત્તર 24 પરગણા પહોંચેલા પશ્ચિમ બંગાળના રાજ્યપાલ સીવી આનંદ બોઝે કહ્યું, ‘હું સવારથી મેદાનમાં છું… લોકોએ મને વિનંતી કરી, રસ્તામાં મારા કાફલાને રોક્યો. તેઓએ મને આસપાસ થઈ રહેલી હત્યાઓ વિશે જણાવ્યું, ગુંડાઓ દ્વારા તેમને મતદાન મથકો પર જવા ન દેવા વિશે જણાવ્યું. આ મામલે અમો સૌ ચિંતિત છીએ. લોકશાહી માટે આ સૌથી પવિત્ર દિવસ છે…ચૂંટણી મતપત્રથી થવી જોઈએ ગોળીઓથી નહીં…’
મતદાન શરૂ થાય એ પહેલાં જ લાંબી કતારો લાગી હતી
બંગાળ પંચાયતની ચૂંટણીમાં લોકોમાં મતદાનને લઈને ભારે ઉત્સાહ જોવા મળ્યો હતો. અહીંથી જે ફોટો અને વીડિયો સામે આવ્યા છે તેમાં વોટિંગ શરૂ થાય તે પહેલા જ લોકોની લાંબી કતારો લાગી ગઈ હતી. સાઉથ 24 પરગણાના બસંતી વિસ્તારમાં વરસાદમાં લોકો છત્રી લઈને ઉભા હતા. મતદારોમાં મહિલાઓની સંખ્યા વધુ જોવા મળી હતી.
મતદાન અપડેટ્સ
- પૂર્વ મેદિનીપુરના નંદીગ્રામ બ્લોક 1ના રહેવાસીઓએ ટીએમસી પર બૂથ કેપ્ચરિંગનો આરોપ લગાવીને ચૂંટણીનો બહિષ્કાર કર્યો હતો.
- લોકોનું કહેવું છે કે મહમદપુરના બૂથ નંબર 67 અને 68માં કેન્દ્રીય દળ તહેનાત કરવામાં આવે. ફોર્સ તહેનાત ન થાય તો તેઓ મતદાન કરશે નહીં.
- શનિવારે વહેલી સવારે મુર્શિદાબાદના શમશેરગંજ વિસ્તારમાં ટીએમસી અને કોંગ્રેસના કાર્યકરો વચ્ચે ઝપાઝપી થઈ હતી.
9,013 બેઠક પર ઉમેદવારો બિનહરીફ ચૂંટાયા છે
રાજ્યમાં કુલ 73,887 ગ્રામ પંચાયત બેઠકો છે, જેમાંથી 9,013 બેઠકો પર ઉમેદવારો બિનહરીફ ચૂંટાયા હતા. બિનહરીફ ચૂંટાયેલા સૌથી વધુ 8,874 ઉમેદવારો તૃણમૂલ કોંગ્રેસના છે. જ્યારે ભાજપના 63, કોંગ્રેસના 40 અને સીપીએમના 36 ઉમેદવારો બિનહરીફ ચૂંટાયા હતા.
વર્ષ 2018ની પંચાયત ચૂંટણીના આંકડાઓ પર નજર કરીએ તો 58,692 બેઠકોમાંથી 20,078 એટલે કે 34.2% બેઠકો બિનહરીફ થઈ હતી. આમાંથી લગભગ તમામ સીટો ટીએમસીએ જીતી હતી.
ટીએમસીના 61,591 ઉમેદવારે ફોર્મ ભર્યા હતા
બંગાળમાં પંચાયત ચૂંટણીનું શેડ્યૂલ 8 જૂને જાહેર કરવામાં આવ્યું હતું. નામાંકન ભરવાની છેલ્લી તારીખ 15 જૂન હતી. શાસક ટીએમસી ગ્રામ પંચાયત, પંચાયત સમિતિ અને જિલ્લા પરિષદની ચૂંટણીઓ માટે દાખલ કરાયેલા નામાંકનમાં આગળ હતી. રાજ્ય ચૂંટણી પંચ અનુસાર, TMC પાસે સૌથી વધુ 61,591 ઉમેદવારો છે, જે લગભગ 97% છે.
બીજા નંબરે ભાજપ છે, જેણે 60% બેઠકો માટે 38,475 ઉમેદવારો ઉભા રાખ્યા છે. CPIMએ 56% (35,411) બેઠકો પર ઉમેદવારો ઉભા રાખ્યા છે. જો કે ગ્રામ પંચાયતના ઉમેદવારોના મામલામાં કોંગ્રેસ અપક્ષ ઉમેદવારો કરતા પણ પાછળ રહી ગઈ છે. જ્યારે 16,335 અપક્ષોએ ઉમેદવારી નોંધાવી છે, જ્યારે કોંગ્રેસ દ્વારા માત્ર 11,774 ઉમેદવારીપત્રો ભરાયા છે.
કોંગ્રેસ-CMPમાં કરાર
બંગાળની કેટલીક સીટો પર કોંગ્રેસ-સીપીએમે એકબીજા સામે ઉમેદવારો ઉભા રાખ્યા નથી. તેવી જ રીતે, આમ આદમી પાર્ટીએ પણ આ ચૂંટણીમાં પોતાનો ઉમેદવાર ઉતાર્યો નથી, TMC સાથે ચૂંટણી લડી નથી. એનપીપીએ પણ કોઈ દાવો રજૂ કર્યો નથી.
સૌથી વૃદ્ધ અને સૌથી યુવા ઉમેદવાર
પશ્ચિમ બર્દવાન જિલ્લાની અમલાજોડા ગ્રામ પંચાયત માટે ભાજપના ઉમેદવાર 85 વર્ષીય ઉમા રાની મિશ્રા કહે છે કે સેવા માટે કોઈ ઉંમર હોતી નથી. TMCએ દક્ષિણ દિવસાજપુરની ધલપાડા ગ્રામ પંચાયતમાંથી 23 વર્ષીય ચુમકી ઘોષને ટિકિટ આપી છે. માત્ર 2 ફૂટ ઉંચી ચુમકી ઘોષ હિલી સરકારી કોલેજમાં ત્રીજા વર્ષની વિદ્યાર્થિની છે.
