
શિવસેનાના એકનાથ શિંદે જૂથના ધારાસભ્ય સંજય શિરસાટે ઉદ્ધવ જૂથના સાંસદ પ્રિયંકા ચતુર્વેદી પર વિવાદાસ્પદ નિવેદન આપ્યું છે. તેમણે રવિવારે (30 જુલાઈ) કહ્યું કે આદિત્ય ઠાકરે પ્રિયંકાને તેમની સુંદરતા જોઈને રાજ્યસભામાં લઈ આવ્યા. ઔરંગાબાદના ધારાસભ્ય સંજયે દાવો કર્યો કે આ વાત ઉદ્ધવ જૂથના નેતા ચંદ્રકાંત ખૈરેએ કહી હતી.
આદિત્યએ કહ્યું- સંજયનું મગજ સડેલું છે
સંજય શિરસાટની ટિપ્પણી આવ્યા બાદ આદિત્ય ઠાકરેએ કહ્યું કે સંજયનું મગજ સડી ગયું છે. મને ખબર નથી કે આવી માનસિકતા ધરાવતા લોકો રાજકારણમાં કેવી રીતે અને શા માટે આવે છે? તે જ સમયે પ્રિયંકા ચતુર્વેદીએ જવાબ આપતા કહ્યું- ‘કોઈ ગદ્દારને કહેવાની જરૂર નથી કે હું કેવી દેખાઉં છું અને જ્યાં છું ત્યાં કેવી રીતે પહોંચી?

પ્રિયંકા 2019માં શિવસેનામાં જોડાઈ હતી
પ્રિયંકા ચતુર્વેદીએ 2019ની વિધાનસભા ચૂંટણી પહેલા કોંગ્રેસ છોડી દીધી હતી. આ પછી તે ઉદ્ધવ જૂથ સાથે શિવસેનામાં જોડાઈ ગયા. પ્રિયંકા કોંગ્રેસમાં પ્રવક્તા હતા. કોંગ્રેસ છોડતા પહેલા તેમણે પૂર્વ કોંગ્રેસ અધ્યક્ષ રાહુલ ગાંધીને પત્ર લખીને કહ્યું હતું કે પાર્ટીમાં તેમના કામની અવગણના કરવામાં આવી રહી છે.