News Updates
ENTERTAINMENT

બેન સ્ટોક્સે રેકોર્ડ 182 રન બનાવ્યા:ઇંગ્લેન્ડના વન-ડે ઈતિહાસમાં સર્વોચ્ચ વ્યક્તિગત સ્કોર; ન્યૂઝીલેન્ડને 181 રનથી હરાવ્યું

Spread the love

ઇંગ્લેન્ડનો ઓલરાઉન્ડર બેન સ્ટોક્સ ODI ક્રિકેટમાં બેવડી સદી ફટકારવાનું ચૂકી ગયો. તેણે લંડનના ઓવલ મેદાનમાં ન્યૂઝીલેન્ડ સામે 182 રનની ઇનિંગ રમી હતી. આ ઇનિંગમાં તેણે 15 ચોગ્ગા અને 9 છગ્ગા ફટકાર્યા હતા. ઇંગ્લેન્ડના ODI ઈતિહાસમાં આ સર્વોચ્ચ વ્યક્તિગત સ્કોર છે. સ્ટોક્સ પહેલા જેસન રોયે 2018માં ઓસ્ટ્રેલિયા સામે 180 રન બનાવ્યા હતા.

લંડનના કેનિંગ્ટન ઓવલ મેદાન પર ન્યૂઝીલેન્ડે ટોસ જીતીને પ્રથમ બોલિંગ કરવાનું પસંદ કર્યું હતું. પ્રથમ બેટિંગ કરતા ઇંગ્લેન્ડની ટીમ 48.1 ઓવરમાં 368 રન બનાવીને ઓલઆઉટ થઈ ગઈ હતી. ન્યૂઝીલેન્ડ તરફથી ટ્રેન્ટ બોલ્ટે 5 વિકેટ લીધી હતી. જવાબમાં ન્યૂઝીલેન્ડની ટીમ 187 રન બનાવીને ઓલઆઉટ થઈ ગઈ હતી અને 181 રનથી મેચ હારી ગઈ હતી. 4 મેચની શ્રેણીમાં ઇંગ્લેન્ડ 2-1થી આગળ છે. ચોથી વન-ડે 15 સપ્ટેમ્બરે રમાશે.

ઇંગ્લેન્ડના 6 ટોપ સ્કોરમાંથી 5 2015 પછી બન્યા
બેન સ્ટોક્સે 182 રન બનાવીને ઇંગ્લેન્ડ માટે સૌથી વધુ વ્યક્તિગત સ્કોરનો રેકોર્ડ બનાવ્યો હતો. તેણે જેસન રોયનો રેકોર્ડ તોડ્યો, જેણે 2018માં ઓસ્ટ્રેલિયા સામે 180 રન બનાવ્યા હતા.

ઇંગ્લેન્ડના ટોપ-6માં 5 સ્કોર 2015 ODI વર્લ્ડ કપ પછી બન્યા છે. આ વર્લ્ડ કપમાં ઇંગ્લેન્ડની ટીમ ગ્રુપ સ્ટેજમાં બાંગ્લાદેશ સામે હારીને બહાર થઈ ગઈ હતી. ટોપ-6 સ્કોરમાં નંબર-4 પર રહેલા રોબિન સ્મિથે 1993માં ઓસ્ટ્રેલિયા સામે 167* રન બનાવ્યા હતા.

સ્ટોક્સ ટોપ વન-ડે સ્કોરથી ઘણો પાછળ રહ્યો
જો સ્ટોક્સે આખી 50 ઓવર બેટિંગ કરી હોત તો તેણે ઇંગ્લેન્ડ માટે બેવડી સદી ફટકારી હોત. આવું કરનાર તે ઇંગ્લેન્ડનો પ્રથમ અને વિશ્વનો નવમો ખેલાડી બની ગયો હોત. અત્યાર સુધી 4 દેશોના 8 ખેલાડીઓએ વન-ડેમાં 10 બેવડી સદી ફટકારી છે. ભારતના રોહિત શર્માના નામે 3 બેવડી સદી છે. તેણે 2014માં શ્રીલંકા સામે 264 રન બનાવ્યા હતા. આ વન-ડે ઈતિહાસનો સૌથી મોટો સ્કોર છે.

રોહિત સિવાય ભારતના 4 વધુ ખેલાડીઓએ પણ વન-ડેમાં બેવડી સદી ફટકારવાની સિદ્ધિ હાંસલ કરી છે. જેમાં સચિન તેંડુલકર, વીરેન્દ્ર સેહવાગ, શુભમન ગિલ અને ઈશાન કિશનનો સમાવેશ થાય છે.

અન્ય દેશોમાં, પાકિસ્તાનના ફખર ઝમન (210* રન), વેસ્ટ ઈન્ડિઝના ક્રિસ ગેલ (215 રન) અને ન્યૂઝીલેન્ડના માર્ટિન ગુપ્ટિલ (237* રન) એ પણ વન-ડેમાં બેવડી સદી ફટકારવાની સિદ્ધિ હાંસલ કરી છે.

બેન સ્ટોક્સ ત્રીજી ઓવરમાં જ બેટિંગ કરવા આવ્યો
લંડનના ધ ઓવલ મેદાન પર ટોસ હારીને પ્રથમ બેટિંગ કરવા આવેલી ઇંગ્લેન્ડે 13 રનમાં 2 વિકેટ ગુમાવી દીધી હતી. ટ્રેન્ટ બોલ્ટે જોની બેયરસ્ટો (0 રન) અને જો રૂટ (4 રન)ને કેચ આઉટ કર્યા હતા. બેન સ્ટોક્સ નંબર-4 પર બેટિંગ કરવા આવ્યો હતો. તેણે ઓપનર ડેવિડ મલાન સાથે 199 રનની ભાગીદારી કરી હતી.

ડેવિડ મલાન 95 બોલમાં 96 રન બનાવીને આઉટ થયો હતો અને બંને વચ્ચેની ભાગીદારી તૂટી ગઈ હતી. મલાનને પણ બોલ્ટે પેવેલિયન મોકલ્યો હતો.

બટલર સાથે 78 રનની ભાગીદારી કરી હતી
માલનની વિકેટ બાદ સ્ટોક્સે કેપ્ટન જોસ બટલર સાથે માત્ર 46 બોલમાં 78 રનની ભાગીદારી કરી હતી. બટલર 24 બોલમાં 38 રન બનાવીને ગ્લેન ફિલિપ્સનો શિકાર બન્યો હતો. આ ભાગીદારીમાં સ્ટોક્સે 22 બોલમાં 38 રન બનાવ્યા હતા.

બટલર બાદ લિયામ લિવિંગસ્ટન પણ 11 રન બનાવીને આઉટ થયો હતો. આ સમયે ઇંગ્લેન્ડનો સ્કોર 5 વિકેટે 336 રન પર પહોંચી ગયો હતો.

ઇંગ્લેન્ડ માટે સૌથી મોટો સ્કોર બનાવ્યો
બીજા છેડેથી સતત વિકેટો પડતી હોવા છતાં સ્ટોક્સે તેની આક્રમક ઇનિંગ ચાલુ રાખી હતી. તેણે 30મી ઓવર પહેલા જ તેની સદી પૂરી કરી હતી અને 40મી ઓવર સુધીમાં 150 રનનો આંકડો પણ પાર કરી લીધો હતો. 45મી ઓવરમાં, તેણે બેન લિસ્ટરની બોલ પર મિડ-વિકેટ તરફ સિક્સર ફટકારી અને ઇંગ્લેન્ડ માટે સૌથી વધુ વ્યક્તિગત સ્કોરનો રેકોર્ડ બનાવ્યો.

સ્ટોક્સ 182 રન બનાવવાના બીજા જ બોલ પર ડીપ સ્ક્વેર લેગ પર કેચ આઉટ થયો હતો. તેણે પોતાની ઇનિંગમાં 15 ચોગ્ગા અને 9 છગ્ગા ફટકાર્યા હતા. આ સમયગાળા દરમિયાન તેનો સ્ટ્રાઈક રેટ 146.77 હતો.

બોલ્ટે 5, લિસ્ટરે 3 વિકેટ લીધી
ઇંગ્લેન્ડની ટીમ 48.1 ઓવરમાં 268 રનના સ્કોર પર ઓલઆઉટ થઈ ગઈ હતી. ન્યૂઝીલેન્ડ તરફથી ટ્રેન્ટ બોલ્ટે સૌથી વધુ 5 વિકેટ લીધી હતી. જ્યારે બેન લિસ્ટરને 3 વિકેટ મળી હતી. લોકી ફર્ગ્યુસન અને ગ્લેન ફિલિપ્સને પણ એક-એક વિકેટ મળી હતી.

ન્યુઝીલેન્ડની શરૂઆત ખરાબ રહી હતી
369 રનના લક્ષ્યને ચેઝ કરવા આવેલી ન્યૂઝીલેન્ડની ટીમે 37 રનમાં 4 વિકેટ ગુમાવી દીધી હતી. કેપ્ટન ટોમ લાથમ 3 રન, હેનરી નિકોલ્સ 4, વિલ યંગ 12 અને ડેવોન કોનવે 9 રન બનાવીને આઉટ થયા હતા. 70 રનના સ્કોર પર ટીમે ડેરિલ મિચેલ (17 રન)ની વિકેટ પણ ગુમાવી દીધી હતી.

ગ્લેન ફિલિપ્સે જવાબદારી સંભાળી હતી
ગ્લેન ફિલિપ્સ અને રચિન રવીન્દ્રએ ન્યૂઝીલેન્ડની ટીમની કમાન સંભાળી લીધી હતી અને પ્રથમ 5 વિકેટ વહેલી ગુમાવી દીધી હતી. બંનેએ ટીમના સ્કોરને 100 રનથી પાર કરી લીધો હતો. પરંતુ 28 રન બનાવીને રવીન્દ્ર મોઈન અલીનો શિકાર બન્યો હતો. ફિલિપ્સ હજુ પણ એક છેડે રહ્યો, તેણે પોતાની ફિફ્ટી પૂરી કરી અને કાઇલ જેમ્સન સાથે ફિફ્ટીની ભાગીદારી કરી.

ટીમ 187ના સ્કોર પર ઓલઆઉટ થઈ ગઈ
જેમ્સન 14 રન બનાવીને આઉટ થયો હતો. તેના પછી ફિલિપ્સ પણ લિયામ લિવિંગસ્ટનના બોલ પર LBW બન્યો હતો. ફિલિપ્સે 72 રન બનાવ્યા હતા. ટીમે 187 રનમાં તમામ 10 વિકેટ ગુમાવી દીધી હતી. ટ્રેન્ટ બોલ્ટે 2, બેન લિસ્ટરે 4 અને લોકી ફર્ગ્યુસને 5 રન બનાવ્યા હતા.

ઇંગ્લેન્ડ તરફથી ક્રિસ વોક્સ અને લિવિંગસ્ટને 3-3 વિકેટ મળી હતી. રીસ ટોપ્લેને 2 જ્યારે સેમ કુરાન અને મોઈન અલીએ એક-એક વિકેટ ઝડપી હતી. 182 રન બનાવનાર ઇંગ્લેન્ડનો બેન સ્ટોક્સ પ્લેયર ઓફ ધ મેચ બન્યો હતો.

ચોથી વન-ડે શુક્રવારે રમાશે
ત્રીજી વન-ડેમાં 181 રને જીત મેળવીને ઇંગ્લેન્ડે 4-ODI શ્રેણીમાં 2-1ની સરસાઈ મેળવી લીધી છે. પ્રથમ વન-ડે ન્યૂઝીલેન્ડ અને બીજી ઇંગ્લેન્ડે જીતી હતી. શ્રેણીની ચોથી અને છેલ્લી વન-ડે 15 સપ્ટેમ્બરે લંડનના લોર્ડ્સ મેદાન પર રમાશે.


Spread the love

Related posts

દેશ માટે અનેક મેડલ જીતનાર અર્જુન એવોર્ડ વિજેતા ખેલાડી પર લાગ્યો બળાત્કારનો આરોપ

Team News Updates

WPL 2024ની ધમાકેદાર શરૂઆત, ભારે રોમાંચક મેચમાં મુંબઈએ દિલ્હીને અંતિમ બોલ પર હરાવ્યું

Team News Updates

શું છે પાકિસ્તાનની હીરામંડીનો ઈતિહાસ? જેના પર સંજય લીલા ભણસાલી બનાવી રહ્યા છે વેબ સિરીઝ

Team News Updates