વાપીના રાતા વિસ્તારમાં ભાજપના ઉપપ્રમુખની ફાયરિંગ કરી હત્યા કરવામાં આવી હતી. તે કેસમાં મૃતકની પત્નીએ ડુંગરા પોલીસ મથકે શંકાસ્પદ 6 અને 2 અજાણ્યા ઈસમો સામે ફરિયાદ નોંધાવી હતી. જેથી વલસાડ જિલ્લા પોલીસની અલગ-અલગ ટીમોએ તપાસ હાથ ધરી હતી. FIRમાં નામ જોગ જણાવ્યાં મુજબ શંકાસ્પદ 6 ઇસમોને રાઉન્ડ અપ કરી વલસાડ જિલ્લા પોલીસે આગળની તપાસ હાથ ધરી છે.
શું છે સમગ્ર મામલો?
વાપીના રાતા વિસ્તારમાં ભાજપના ઉપપ્રમુખની ફાયરિંગ કરી હત્યા કરવામાં આવી હતી. ભાજપના ઉપપ્રમુખ શૈલેષ પટેલ પરિવાર સાથે શિવ મંદિરે દર્શન કરવા ગયા હતા. ત્યારે બાઇક પર આવેલા અજાણ્યા શખસોએ 4 રાઉન્ડ ફાયરિંગ કરી ઘટનાને અંજામ આપ્યો હતો. એ બાદ શખસો ફરાર થઈ ગયા હતા. જૂની અંગત અદાવતમાં હત્યા થઈ હોવાની આશંકા વ્યક્ત કરવામાં આવી હતી. પહેલી વખત બોડીગાર્ડ વગર પરિવાર સાથે શિવ મંદિરે ગયા હતા.જ્યાં આરોપીઓ શૈલેષભાઇ એકલા હોવાની તકનો લાભ ઉઠાવી 4 રાઉન્ડ ફાયરિંગ કર્યું હતું. જેમાં 3 રાઉન્ડ ગોળીઓએ તેમનો જીવ લીધો હતો.
આ ઘટનાને પગલે વલસાડ જિલ્લાના પોલીસની અલગ-અલગ 7 ટીમોએ તપાસ હાથ ધરી હતી. ઘટના અંગે શૈલેષભાઇ પટેલના પત્ની નયનાબેન પટેલે જૂની અદાવતમાં શકમંદ 6 ઇસમો અને 2 અજાણ્યા ઈસમોએ હત્યા કરી હોવાની ફરિયાદ નોંધાવી હતી. જે ફરિયાદના આધારે વલસાડ જિલ્લા પોલીસે નયનાબેને ફરિયાદમાં નામ જોગ જણાવેલ 6 ઇસમોને રાઉન્ડ અપ કરી પ્રાથમિક તપાસ હાથ ધરી છે.
