બુમરાહે શુક્રવારે આયર્લેન્ડ સામેની T20 મેચમાં 11 મહિના પછી આંતરરાષ્ટ્રીય ક્રિકેટમાં કમબેક કર્યું છે, પરંતુ આ મેચમાં તે ફરીથી ઈજાથી બચ્યો હતો. જો તેણે પોતાની જાતને સંભાળી ન હોત તો તે બાઉન્ડ્રી લાઇન પર રવિ બિશ્નાઈ સાથે અથડાઈ ગયો હોત.
હકીકતમાં, શુક્રવારે, ડબલિનના ધ વિલેજ સ્ટેડિયમમાં આયર્લેન્ડ અને ટીમ ઇન્ડિયા વચ્ચે ત્રણ T20 મેચની શ્રેણીની પ્રથમ મેચ રમાઈ હતી. નિયમિત કેપ્ટન રોહિત શર્માની ગેરહાજરીમાં જસપ્રીત બુમરાહ ટીમની આગેવાની કરી રહ્યો છે. રોહિત સહિતના સિનિયર ખેલાડીઓને આ શ્રેણીમાંથી બ્રેક આપવામાં આવ્યો છે. વરસાદ વિક્ષેપિત આ મેચમાં ભારતે DLS પદ્ધતિ હેઠળ 2 રને જીત મેળવી હતી.
બુમરાહે ટોસ જીતીને પ્રથમ ફિલ્ડિંગ કરવાનો નિર્ણય કર્યો હતો. મેચની 14મી ઓવરમાં ભારત તરફથી વોશિંગ્ટન સુંદરબોલિંગ કરી રહ્યો હતો. આ ઓવરના પાંચમાં બોલ પર કર્ટિસ કેમ્ફરે બાઉન્ડ્રી ફટકારી હતી. બિશ્નોઈ અને બુમરાહ અલગ-અલગ દિશામાંથી બાઉન્ડ્રી બચાવવા માટે ઝડપથી દોડ્યા.
બિશ્નોઈ ડીપ બેકવર્ડ સ્ક્વેર લેગથી દોડે છે, બુમરાહની પહેલા પહોંચે છે અને બોલ પકડવાનું શરૂ કરે છે. આ સાથે જ બુમરાહ પણ પહોંચી ગયો હતો. બંને ટકરાવાના જ હતા ત્યારે બુમરાહ નીચે ઝૂકી ગયો અને બોલ પકડી રહેલા બિશ્નોઈ ઉપર કૂદી પડ્યો અને બાઉન્ડ્રી પાર ગયો. આ દરમિયાન બોલ બાઉન્ડ્રી લાઇનને અડી ગયો અને આયર્લેન્ડને ફોર મળી.
જો બુમરાહે કૂદકો ન માર્યો હોત તો બંને ટકરાયા હોત, કારણ કે બુમરાહ ખૂબ જ ઝડપી હતો. આવી સ્થિતિમાં તેની સાથે બિશ્નોઈ પણ ઘાયલ થઈ શકે છે.
બુમરાહને ગયા વર્ષે સપ્ટેમ્બરમાં પીઠમાં દુખાવો થયો હતો
બુમરાહને ગયા વર્ષે સપ્ટેમ્બરમાં પીઠમાં દુખાવો થયો હતો. આ વર્ષે માર્ચમાં બુમરાહ ન્યૂઝીલેન્ડ ગયો હતો અને તેની પીઠની સર્જરી કરાવી હતી. તે T20 એશિયા કપ અને ત્યારબાદ T20 વર્લ્ડ કપમાં પણ ટીમ ઈન્ડિયાનો ભાગ નહોતો.
આયર્લેન્ડ સામે બે વિકેટ લીધી હતી
આયર્લેન્ડ સામેની પ્રથમ T20 મેચમાં બુમરાહે 4 ઓવરમાં 24 રન આપીને 2 વિકેટ લીધી હતી.
એશિયા કપ પહેલા બુમરાહ માટે આ સિરીઝ ઘણી મહત્વની
બુમરાહ માટે આ સિરીઝ ઘણી મહત્વની છે. સિરીઝ પૂરી થયા બાદ એશિયા કપ 30 ઓગસ્ટથી શરૂ થવાનો છે અને તે પછી 5 ઓક્ટોબરથી ભારતમાં ODI વર્લ્ડ કપ શરૂ થશે. બુમરાહ લગભગ 11 મહિનાથી આંતરરાષ્ટ્રીય ક્રિકેટથી દૂર હતો. તે છેલ્લા કેટલાક મહિનાઓથી નેશનલ ક્રિકેટ એકેડમીમાં ડોક્ટરોની દેખરેખ હેઠળ રિહેબિંગ કરી રહ્યો હતો. આવી સ્થિતિમાં બુમરાહ માટે આયર્લેન્ડમાં પોતાની ફિટનેસ સાબિત કરવી અને લય મેળવવી મહત્વપૂર્ણ છે.
